JOB 42

1Chantá Jobqa Tata Diosman kuticherqa: 2Noqa yachani Qanqa tukuy imata ruwayta atisqaykita; Qampajqa mana imapis kanchu mana atikojqa. 3Pitaj noqa kasqani Qampa atiyniykimanta iskayrayanaypaj, jinamanta mana yachayniyoj kasqayta rikuchispari? Noqaqa parlasharqani imastachus mana yachasqayta, chay jina t'ukuna imasta mana entiendesqayta. 4Qan niwarqanki: Uyariway, qanwan parlayta munani, kutichiwaytaj kay tapususqasniyman, nispa. 5Kunankama, uyarispalla Qantaqa rejserqayki, kunantajrí, ñawisniywan rikuyki. 6Chayrayku kunanqa chay nisqaymanta p'enqakuni, Qanmantaj kutirikamuyki jallp'a patapi, ushpha patapi ima tiyaspa, nispa nerqa Jobqa. 7Tata Diosqa chay imasta Jobman parlaytawan, Elifazmanñataj nerqa: Noqaqa qampaj phiñasqa kashani, jinallataj chay iskay kawsaqesniykipajpis, imaraykuchus qankunaqa Noqamanta mana cheqantachu parlankichej, imaynatachus kamachiy Job parlarqa, jinataqa. 8Kunanqa qanchis torosta, qanchis carnerostawan qhatirikuspa, kamachiy Jobman riychej; chaypitaj chay uywasta qankunarayku q'olachispa jaywamuychej chay jinata parlasqaykichejmanta. Chantá kamachiy Jobqa qankunarayku Noqamanta mañapusonqachej, Noqataj chay mañapusqasuykichejta uyarisaj. Jinamanta mana castigasqaykichejchu, imaraykuchus qankunaqa castigasqapuni kanaykichej karqa, Noqamanta mana cheqanta parlasqaykichejrayku, imaynatachus kamachiy Job parlarqa, jinata, nispa nerqa Tata Diosqa. 9Chantá Elifazwan, Bildadwan, Zofarwanqa Tata Diospa nisqanman jina ruwarqanku, Tata Diostaj Jobpa mañakusqanta uyarerqa. 10Job ajinata kawsaqesnimpaj mañapusqantawan, Tata Diosqa Jobman kutichiporqa ñawpaj kapusqanmanta iskay jinastawan. 11Chaymantataj jamorqanku watukoj tukuy wawqesnin, panasnin, kawsaqesnin, ñawpajta tukuy kawsaqesnin kajkunapiwan. Watukoj jamuspa, mayta kusikorqanku, jatuchaj mikhuykunata wayk'uspataj wasimpi mikhorqanku. Chaypi paykunaqa mayta llakikusqankuta nispa, Jobta sonqocharqanku, tukuy ima ñak'ariyta Tata Dios apachimusqanmanta, jinaytawantaj sapa ujninku qolqesta qorqanku, qori anillota ima. 12Chantá Tata Diosqa Jobta bendecerqa chay wataspi, ñawpaj watasmanta nisqaqa astawan. Chay qhepapi Jobpataqa tiyaporqa chunka tawayoj waranqa ovejas, sojta waranqa camellos, waranqa yunta bueyes, waranqa china burros ima. 13Chaymantaqa tiyapullarqataj qanchis churisnin, kinsa ususisnin ima. 14Kuraj kaj ususimpa sutin karqa Jemima, chawpi kajpata Cesia, kinsa kajpatataj Keren-hapuc. 15Tukuy kay pachapi mana pipis Jobpa ususisnin jina k'achitas karqachu. Jobqa chay ususisninman, churisninman ima tukuy kapuyninta herenciata qoporqa. 16Chaymanta qhepaman pachaj tawa chunkayoj watastaraj kawsarqa, jinamanta payqa rejserqaraj wawasninta, allchhisninta, allchhisnimpa wawasninta, allchhisnimpa allchhisnintawanraj. 17Jinamanta Jobqa allin machuña, ashkha watasniyojtaj wañuporqa.

will be added

X\