1 Tata Diosqa Jobman nillarqapuni: 2 Qanqa pleitopi tinkuyta munarqanki Noqa Tukuy Atiyniyoj Kajwan. Noqawan tinkuyta munajqa chayman kutichiwachun, nispa. 3 Chantá Jobqa Tata Diosman kuticherqa: 4 Pitaj noqa kasqani Qanman kutichisuyta atinaypajri? Chayrayku ch'inlla kakuyta munani. 5 Noqaqa ashkhataña parlani; manaña imapis ninay kanchu, nispa. 6 Chantá Tata Diosqa ujtawan Jobman sinch'i muyoj wayra chawpimanta parlamorqa: 7 Kunanqa may wapu kasqaykita rikuchiway, kay tapuyniykunamantaj kutichiway: 8 Qanqa mana cheqan kasqayta nispa, juchachawayta munanki; jinamanta qanqa mana juchayoj rikhuriyta yuyanki. 9 Qanqa Noqa jina atiyniyojchu kanki? Qampa sinch'i parlasqaykeqa Noqaj jatunmanta parlasqay jinachu? 10 Jina kajtenqa, jatun kaywan, sumajpaj qhawasqa kaywan ima p'achallikuy. Jatun kaywan, ima munay qhawasqa kaywan ima qhatakuy. 11 Qhawariy tukuy jatunchakojkunata; chantá sinch'i phiñakuyniykita kacharispa, paykunata urmachiy. 12 Jatunchakojkunata ujta qhawarispalla k'umuykuchiy. Sajra runastaqa, maypichus kashanku, chaypi saruy. 13 Tukuyninkuta jallp'aman p'ampaykuy, wañusqaspa carcelninkuman wisq'aykuy. 14 Chaymantaraj Noqa kikiy nisaj qampa atiyniykiwan tukuy imata atipasqaykita. 15 Allinta reparay chay manchachikuna animal Behemotta; chaypis Noqaj ruwasqallaytaj qan jina. Payqa pastota mikhun waka jina. 16 Qhaway, chay animalqa wasampi may jina kallpayoj, sinch'i kasqampis rikukun wijsa mat'asnimpi. 17 Chupantaqa k'aspiyarichin may jina chuki cedropis kanman jina, chaki ankusnimpis may jina simp'asqa. 18 Tullusnimpis bronce tubos jina, fierro varillaspis kanman jinataj. 19 Chayqa tukuy imamanta aswan ñawpaj ruwasqay karqa, chaytaqa Noqalla atipayta atini ruwajnin jina. 20 Maypichus k'ita animales pujllanku, chay orqospi wiñan pastos pay mikhunampaj. 21 Llanthullapi winkumun, qhochispi purin, t'otoras ukhupitaj pakakun. 22 Thansa sach'asqa llanthunkuwan payta pakaykunku, mayuspi saucestaj muyuykunku. 23 Yaku ashkha chayamojtimpis mana mancharikunchu; tukuynin yaku senqanmanña chayashajtimpis, manapuni mancharikunchu. 24 Pitaj jap'iyta atinman, ñawintataj orqhonman, chayrí senqanta lazota pasachiyta atinmanri?
