1 Chantá Temanmanta Elifazqa parlarerqa kay jinata: Kunanqa Job, sichus pillapis imata parlarisunkiman chayqa, ichapis qampajqa mana allinchu kanman. Chaywampis mana pipis ch'in kakuyllataqa atinmanchu. 3 Qanqa tukuyman sumaj imasta yachachej kanki; llawch'iyasqatapis kallpachaj kanki. 4 Pichus misk'akojtaqa parlasqaykiwan kallpachaspa sayarichej kanki; urmakoj jina kashajtapis jap'iykurej kanki. 5 Kunanqa qanman kay llakiy imas jamusojtinrí, q'enaqakushanki. Qanman kay ñak'ariy chayamusojtin, t'ukushanki. 6 Qanqa Diospa uj sumaj kamachin kanki, tukuy imatapis sumaj cheqanta ruwaj runa. Chantá imaraykutaj Diospi mana tukuy sonqo atienekunkichuri? 7 Kunanqa reparakuy ari: Pitaj mana juchayoj kashaspa chinkaporqari? Maypitaj sumaj cheqanta purejqa chinkachisqa karqari? 8 Noqaqa rikuspa parlani. Pikunachus sajrata ruwaspa llakiyta tarpojkunaqa, chayllatataj oqharinku. 9 Diosqa samaynillanwan wañurachin paykunata, sinch'i phiñakuyninwantaj ni uj puchuyojta chinkachin. 10 León jina may jinata qhaparishajtinkupis, Diosqa kirusninkuta p'akiykuspa ch'inyachenqa. 11 Machu león manaña imatapis jap'iyta atispa, wañun; china leonpa uñasnimpis tukuynejman ch'eqerakunku. 12 Pakayllamanta uj imata willawarqanku; ayphullata parlamojta uyarerqani. 13 Ch'isin tukuy runas puñurasqankumantaña, imaymanasta rikorqani mosqoypi jina. 14 Chay ch'isi jamuwarqa manchay manchachikuy, tukuy tullusniypis kharkatitillarqataj. 15 Uj wayralla uyayta phukuspa pasarpariwarqa. Cuerpoypi pelosniypis q'as q'as nispa chhurkuyaykuwarqa. 16 Ñawpaqeypi uj runapis kanman jina sayaykorqa, uyantapis mana rikuyta aterqanichu. Chaymantaqa tukuy imapis ch'inlla kashajtin, uj parlamojta uyarerqani: 17 Runaqa atinmanchu cheqan kayta Diospa ñawpaqempi? Runaqa atinmanchu llimphu kayta Ruwajnimpa ñawpaqempi? 18 Diosqa kamachisnimpi mana atienekunchu. Angelesnimpipis mana allin imastaraj Diosqa tarin. 19 Chayrayku Diosqa astawanraj mana allin imasta runaspi tarenqa, imaraykuchus runasqa jallp'a t'uru jinalla sayasqa kanku. Paykunaqa thuta jinalla sarurparisqa kayta atinku. 20 Tutamanta ch'isiyaykamalla chinkachisqas kanku. Paykunaqa wiñaypaj wañunku, nitaj pipis paykunamanta dakunchu. 21 Runaj kawsaynenqa uj q'aytu p'itikun jinata tukukun; manaraj imastapis allinta yachashaspa wañupun.
