JOB 35

1Eliúqa imatachus yuyasqanman jina nillarqapuni: 2Qanqa yuyankichu qampa kay nisqaykeqa cheqan kasqanta: Noqaqa Diosmanta aswan cheqan kani, nispaqa? 3Qanqa Diosman ninki: Ima dakusunki sichus noqa juchallikuni chayqa? Juchasneyqa imanasunkitajri? nispa. 4Kunanqa, chayman noqa kutichisqayki; chantaqa kawsaqesniykimanwan. 5Qhawariy cielota; phuyusqa qanmanta aswan patapi kashanku. 6Sichus qan juchallikunki chayqa, Diosta mana imananchu; may chhika juchallikusqaykipis Paytaqa mana imananchu. 7Sichus imatapis allinta ruwanki chayqa, imatataj qonki Paymanri? Paypajqa ni ima allintapis ruwashankichu. 8Juchasniykeqa qan jina runasllaman mana allintachu ruwan; allin imasta ruwasqaykipis runasllaman allinta ruwan. 9Runasqa qhaparinku ñak'arichejkunaj makinkupi, mask'ankutaj chay atiyniyojkunamanta pipis librananta. 10Jinapis mana pipis ninchu: Maypitaj kashan ruwawajniy Dios, pichus laqhallapi kashajtiy kallpata qowajri? 11Pay yuyaychawanchej, yachachiwanchejtaj, animalesmanta, p'isqosmantapis aswan yachayniyoj kananchejpaj, nispa. 12Paykunaqa qhaparikunku, Diostajrí mana paykunata uyarinchu, imaraykuchus paykuna sajra runas kanku, jatunchakojkunataj. 13Tukuy Atiyniyoj Diosqa manakaj imastaqa mana kasuta ruwanchu. 14Mana Diosta rikunichu, nishaspapis, suyakullay, imaraykuchus Payqa imastachus ruwasqasniykita rikushanña. 15Qanqa ninki Pay mana phiñakusqanta, nitaj castigasqanta, nillataj juchatapis anchata kasuta ruwasqanta. 16Chaywampis, Job, chay imastaqa yanqhallata parlashanki; anchatapuni parlashanki, mana allinta yuyaychakuspa.

will be added

X\