JOB 24

1Imaraykutaj Tukuy Atiyniyoj Dios mana ninchu ima p'unchaychus imatapis ruwananta, kawsaqesnin chay p'unchaypi ruwasqasninta rikunankupaj? 2Sajra runasqa jallp'aj mojonesninta ithirichinku; ovejasta suwanku tropankuman yapaykunankupaj. 3Wajcha wawaspa burronkuta apakapunku; viudaspa bueyesninkuta prendata jina jap'inku. 4Wajcha runasta cheqan ñanmanta pantachinku; chaynejta wajcha runasqa pakakunku. 5Wajcha runasqa k'ita burros jina, mikhunata ch'in pampaspi mask'amunku atispa mana atispa, wawasninkupajpis ch'in pampaspi tarisqankuta apamunku mikhunankupaj. 6Waj runaj jallp'anmanta chajmakamunku, manachayrí sajra runaspa uva huertasninkumantapis chajmakamunku. 7Tutapis sut'iyakunku mana imawan qhataykukuyta atispa; ni imanku kanchu chirimanta jark'akunankupaj. 8Orqospeqa parawan joq'ochikunku, chay paramanta pakakuyta munanku chhanka uraspi. 9Viudaspa wawasninkuta nacejtinkukama qhechunku; wajcha runaspa wawasninkuta prendata jina jap'ikapunku. 10Wajchasta purichinku pisi p'achayojta; trigota q'epichinku mana ima mikhusqasta. 11Molinota wajchaswan muyuchinku aceiteta ch'irwanankupaj; uvasta saruchinku vinota orqhonankupaj, chay wajchas ch'akiywan wañushajtinkupis. 12Llajtapeqa wañuy patapi kajkuna ayqoshanku, parte wañusqastaj sonqo nanayta waqashanku. Diostajrí mañakusqankuta mana uyarinchu. 13Wakenqa k'anchayta chejninku; tukuy puriyninkupi chay k'anchaymanta karunchakunku. 14Runa wañucheqa laqha laqhallapi rin wajchata wañuchimunampaj, ch'isiyaykojtintaj, suwa jina purin. 15Warminta wasanchaj khuchi runaqa laqhayaykunallanta suyan; uyanta sumajta pakaykukun, mana pipis rejsinanta yuyaspa. 16Suwasqa ch'isillan wasismanta suwanku; p'unchayqa tukuyninku pakasqalla kanku. Paykunaqa k'anchayta chejninku. 17Paykunapajqa p'unchaypis tuti laqhawan ninakun, imaraykuchus paykunaqa tutan puriyman yachasqa kanku, nispa nerqa Jobqa. 18Chantá Zofar nerqa: Chay sajra runastaqa yaku apan. Jallp'asninkoqa maldecisqa qhepakunku. Mana pipis chay uvas huertankupi trabajanchu. 19Mana paramojtin, ruphayqa rit'ita yakuyarparichin; ajinallatataj juchasapaspis covachapi chinkapunku. 20Chaykunamantaqa kikin mamanku qonqaponqa. Khurusqa paykunata mikhukaponqanku. Ni jayk'aj paykunamanta pipis yuyarikonqachu. Chay sajra runaqa k'utusqa sach'a jina urmanqa. 21Mana wawata rejsej warmista payqa manchayta llakichej; viudaspajpis manapuni ima allintapis ruwajchu. 22Diostajrí atiyninwan urmachin chay atiyniyoj runasta. Sichus Dios makinta oqharin chayqa, manaña pipis kawsayta yuyanchu. 23Diosqa saqen ni imamanta manchachikuspa kawsajta; chaywampis imaynatachus kawsasqanta sumajta qhawan. 24Uj rato sajra runaqa mayta oqharikun, chaymantataj usqhayllata chinkaripun. Payqa ch'akipun uj t'irasqa qhora jina, uj ch'akisqa trigo uma jina k'umuykun. 25Sichus kay mana jina kanman chayqa, pitaj niwanman noqa llullakusqayta? Pitaj rikuchiwanman noqa pantasqa kasqaytari? nispa nerqa Zofarqa.

will be added

X\