1 Chantá Naamat sutiyoj llajtamanta Zofarqa kutichispa, nerqa: 2 Qanqa sonqoyta t'impurichinki, manataj ch'in kayta atinchu. Chayrayku kunanqa kutichisqayki: 3 Uyaypi nirawasqaykeqa phiñachiwan, noqatajrí yachani imatachus kutichisunayta. 4 Qan yachanki unaymanta kay jinapuni kasqanta, kay jallp'a patapi runas kasqankumantapacha: 5 Sajra runaspa kusikuyninkoqa pisi tiempollapaj kashan; juchasapaj kusikuynenqa uj ratolla kashan. 6 Runaykachasqan janaj pachakama chayajtin, umampis phuyukama oqharikojtin, 7 wanu jina ujllata wiñaypaj chinkanqa. Kawsaqesnenqa mana yachanqankuchu maypichus kasqanta. 8 Mosqoy jina chinkaponqa; ch'isin mosqoypi jina rikusqa jinalla chinkapun, nitaj pipis tariyta atenqachu. 9 Pichus paywan tiyakushaspa rikojqa manaña jayk'ajpis ujtawan payta rikonqachu. 10 Wawasnillanña wajcha runasman kutichiponqanku, imatachus pay suwarqa, chayta. 11 Kallpampi waynapacha covachaman yaykonqa. 12 Sajra kajqa misk'iman rijch'akun, chay runataj qallunwan misk'irichikun; 13 simillampi jap'ispa, misk'irarichikun, alliyllamantataj llunk'urarikun. 14 Wijsan ukhupitajrí, katari venenoman jina tukun. 15 Qhapaj mikhusqasninta lanzarparenqa; Dios orqhonqa chaykunata wijsanmanta. 16 Katarej venenonta ch'onqanqa, chayllataj payta wañuchenqa. 17 Manaña payqa jatunmanta mikhurenqachu imatapis, lechewan, misk'iwan mayu jina rishajmanta. 18 Kutichipunan tiyan tukuy trabajaspa tarisqanta. Chay imastaqa manaña maki junt'ata apaykacharenqachu nitaj mikhuykonqachu. 19 Payqa wajchasmanta kapuyninkuta qhechuspa mana imayojta saqerqa; jap'ikaporqa mana ruwasqan wasista. 20 Mana jayk'ajpis sajsakuyta aterqachu, nitaj imapis librakojchu paypa makinmanta. 21 Ni imapis qhepakojchu oqosiri kayninmantaqa. Chayrayku chay allin kaynenqa manapuni unaypajchu kanqa. 22 May chhika imasniyoj kaspapis, astawan mana kusiyniyoj kanqa; tukuy sajra runaspa makinku paypa patampi kanqa. 23 Wijsanta junt'achikuyta munajtin, Dios apachimonqa paypa patanman sinch'i phiñakuyninta. Chay phiñakuyta paypa patanman parachimonqa. 24 Sichus fierro armasmanta ayqenqa chayqa, uj bronce flecha payta jap'irparenqa. 25 Chay flechaqa cuerponta pasarparenqa, puntantaj llojsenqa k'iwichan chaynejta. Chayqa astawan payta manchaykuchenqa. 26 Tuti laqhayay payta p'ampaykonqa. Ni pejpa enqhasqan nina payta rupharparenqa, jinallataj wasimpi imasninchus kajtapis. 27 Cieloqa paypa juchasninta sut'inchanqa, jallp'ataj payta ch'ataykunampaj sayaykonqa. 28 Diospa phiñakuynin mayu jina wasaykuspa, kapuyninta chinkarparichenqa. 29 Chayta Diosqa waqaychan sajra runaspaj; chaytaqa Dios paykunapaj wakichin, nispa nerqa Zofarqa.
