JOB 19

1Chantá Jobqa kutichispa, nerqa: 2Mayk'ajkamataj llakichiwankichej, parlaykichejwantaj nanachiwankichejri? 3Ñapis chunka kutitaña alqochakuwaspa parlankichej. Manachu chay jinata niwaytaqa p'enqakunkichej? 4Cheqamantachus juchayoj kani chaypis, chay juchayqa noqaj patallayman urmamonqa. 5Qankunaqa yuyakunkichej noqamanta aswan sumaj kasqaykichejta, kay jinapi rikhurisqaytataj uyaypi niwankichej. 6Kunanqa kayta yachaychej allinta: Diospuni noqataqa urmachiwan; Paymin tojllapi ch'ipaykuwan. 7Noqa qhaparikuni: Wañuchishawanku, nispa, nitaj pipis uyariwanchu. Yanapata mañakuni, nitaj pipis justiciata ruwawaj kanchu. 8Diosqa ñanniyta wisq'aykun ama pasanaypaj; Paymin ñanniyta laqhayaykuchin. 9Tukuy kapuyniymanta ch'usajta saqewan; umaymanta pilluytapis qhechuwan. 10Ni imayojta saqerpariwan, manaña ujtawan sayariyta yuyanaypaj jina. 11Phiñakuyninta noqaj contrayta k'ajarichin, enemigonta jinataj qhawawan. 12Soldadosnenqa noqaj contrayta jamunku; wasiypa muyuynimpi jaraykukuspa, ujllata phinkiykamunawankupaj wakichikunku. 13Diosqa noqamanta karunchachin wawqesniyta, kawsaqesniytapis; paykunaqa mana rejsisqata jina qhawawanku. 14Ayllusneyqa manaña watukuwankuchu; rejsisqasniypis qonqakapuwanku. 15Wasiypi tiyakojkuna qonqakapuwanku; warmi kamachisniypis waj runata jinallaña qhawawanku, mana rejsiwaj tukuspa. 16Uj uywasqay kamachiyta wajyani, manataj uyariwanchu, khuyayta wajyakushajtiypis. 17Warmiypis payman qayllajtiy, millachikuwan; wawqesniypis kikillantataj millachikuwanku. 18Wawaspis pisipaj qhawawanku. Jatarejtiykama, contrayta parlarinku. 19Aswan sumaj kaj kawsaqesniy chejnikuwanku; pikunatachus astawan munakoj kani, chaykunapis contraypi kanku. 20Qaraywan, aychaywanqa tulluyman k'askaykunku; ñak'ayllatañapuni kawsashani. 21Khuyawaychej ari qankuna, kawsaqesníy, imaraykuchus Diospuni noqamanqa makinta churaykuwan. 22Imaraykutaj Dios jina qhatiykachawankichejri? Manachu atisqaykichejtaña p'atawankichej? 23Allin kanman pillapis kay parlasqayta qhelqananqa. Allin kanman uj libropi qhelqasqa qhepakunanqa. 24Allin kanman pillapis uj fierro cincelwan titipi chayrí rumipi ch'eqospa, nisqasniyta qhelqanan wiñaypaj qhepakunampaj. 25Noqa yachani Kacharichiwajniy kawsashasqanta, yachallanitaj Pay noqaman kutikunawanta kay pachapi. 26Kay aychay chhikan chhikan laq'akushajtimpis, noqa kikiy Diosta rikusaj. 27Kikin ñawisniywan Payta rikusaj, mana waj runachu, manachayqa noqapuni, sonqoy wañunayashajtimpis. 28Kayta uyarispa, qankunaqa ninaykichej: Imaraykutaj payta qhatiykachanchejri? Ima sajratachus ruwasqasnenqa payllapi kashan, nispa. 29Chaywampis, qankunaqa espadata manchachikuychej, ima espadawanchus Diosqa sajrata castigan, chayta. Qankuna yachaychej uj juez kasqanta, nispa nerqa Jobqa.

will be added

X\