1 Wañupunay p'unchay chayamushanña; kawsayneyqa tukukapushanña; covacha suyakushawanña. 2 Qayllaypeqa alqochakoj runaslla kanku, tuta p'unchaytaj t'ojpillawankupuni. 3 Chaywampis, Diosníy, Qan cuentaymanta parlariyta atinki; mana Qan kutikuwajtiyki, pitaj kutikuwanmanri? 4 Qanmin kaykunaj sonqonkumanta yachayniyoj kayta pakaykunki. Chayrayku ama saqeychu atipanawankuta. 5 Pikunachus imatapis ganakuyta munaspa kawsaqenkuta wasanchanku, chaykunaj wawasninkoj ñawisninku chharpuyaranqanku. 6 Tukuy runaspa parlakunankuta ruwawanki, uyaypi thoqaykunawankupaj jina. 7 Ñawisneyqa nanaywan chharpuyaykuwan; cuerpoyqa llanthu jinalla kashan. 8 Chayta rikuspa, cheqanta purej runasqa t'ukushaj qhepakunku, mana juchayojtaj juchasapaspa contrankuta oqharikonqa. 9 Paykunaqa nillankupuni cheqan kasqankuta, llimphu makiyoj kasqankutawan. 10 Chaywampis kayman jamuychej tukuyniykichej; qankuna ukhupi mana tarisajchu ujllatapis yachayniyojtaqa. 11 Kawsayniypa watasnenqa usqhayta ripushanku. Imastachus yuyasqasniywan, wakichisqasniywan imaqa qhasi manakajman tukunku. 12 Qankunarí tutata p'unchayman tukuchinkichej; laqha kashajtimpis, qankunaqa ninkichej k'anchay qayllamushasqanta. 13 Noqa suyani covachaqa wasiy kananta; laqhayajpi puñunayta mast'akusaj. 14 Khuruswan, covachawanqa tatay, mamay, wawqesniy ima kanku. 15 Maypitaj kashan kunan noqaj suyakuyniyri? Imapichus suyakuni chayta, pitaj chayta rikunmanri? 16 Noqawan khuska ukhu pachaman yaykonqanku; chaypi noqawan khuska jallp'a ukhupi samarikonqanku, nispa nerqa Jobqa.
