JOB 16

1Chantá Jobqa kutichispa, nerqa: 2Sapa kuti uyarini chayman rijch'akojta. Qankuna sonqochanawaykichejtaqa, astawan umayta nanachiwankichej. 3Qhasi manakaj parlayqa jayk'ajtaj tukukunmanri? Ajinata churanakuymampuni yachasqa kankichej. 4Sichus qankuna kunan noqa jina kawajchej chayqa, noqapis qankuna jina parlayta atiykichejman; qankunaj contraykichejta may jinata parlariyta atiyman; qankunata kusipayaspa, umayta khiwiriyta atiyman. 5Chaywampis noqaqa qankunata qhawarispa, k'achamanta parlapayaykichejman; qankunaj nanayniykichejtapis thañirichiykichejman, kallpachaykichejmantaj. 6Mana parlarisqaypis nanayniyta thañichinchu, nitaj ch'in kakojtiypis, nanayneyqa tukukunchu. 7Diosqa kallpayta tukuchin; tukuy kawsaqesniyta qhechuwan. 8Pay k'usupachata saqewan; rajchi kasqay chaytaqa sut'inchashan. Chay tulluyasqayqa uyaypi nipunawampaj oqharikun. 9Phiñakuynenqa mithawan contraypi kasqanrayku; khamurarikun contrayta. Enemigoypis kanman jina ñawisninwan oqoykuwan. 10Runasqa noqaj contrayta tantakamunku; alqochakuwaspa, simisninkuta llint'aykachanku. Uyaypi laq'awanku k'umuykuchinawankupaj. 11Diosqa llulla runaspa makinkuman churawan; juchasapa runaspa makinkuman urmachiwan. 12Ni imamanta llakiyniyoj kawsakushajtiy, kunkaymanta jap'ispa phirita ruwawan. Maymanchus flechananman sayachiwan. 13Tukuynejmanta flechasninta kacharimuwan mana khuyariwaspa, lurunisniyta jusk'urawanku; wijsaypi kaj chhika pampaman thallikun. 14Patampi patampi khallarawan; maqanakoj soldado jina noqaman phinkiykamuwan. 15Llakiy qhashqa p'achasta churakuni; jallp'ata umayman qhallikuni. 16Waqasqaypi uyayqa punkiykuwan, ñawisniytaj laqhayaykuwan. 17Ni ima sajrata pitapis ruwarqanipischu; mañakusqaypis llimphu sonqowan karqa. 18Ay, jallp'a, ama yawarniyta pakaychu ari. Qhaparikusqayqa tukuynejman uyarikuchun. 19Noqaj testigoyqa janaj pachapi kashan; jark'akuwajneyqa patapi kashan. 20Payqa imastachus yuyasqasniyta Diospa ñawpaqempi nenqa, ajinamanta Dios waqasqayta rikunawampaj. 21Pillapis Diospa ñawpaqempi noqarayku parlarichun, imaynatachus pipis runa masinrayku parlapayapun, ajinata. 22Mashkha unaytawanchus kawsanayqa tukukapushanña; ñapis puririsajña mana kutimuyniyojta.

will be added

X\