1 Chantá Temanmanta Elifazqa Jobman kuticherqa: 2 Yachayniyoj runaqa mana qhasi manakaj simi nisqaswanchu kutichin, nitaj yuyayninta sonseraswanchu junt'achin. 3 Mana qhasi manakajllatachu parlan, nitaj qhasimanta imatapis parlallanchu. 4 Qantajrí chay jinata parlajtiyki, Diosta manchachikuy manaña qampi kanchu. Diosmanta mañakuytapis mana kajman tukuchinki. 5 Sonqoykej sajra yuyaynenqa ajinata parlachisunki; chayrayku ch'awkiyaykunaj parlayninkuta parlanki. 6 Mana noqarajchu ch'atanasuy kashan; qampa simillaykitaj juchachashasunki. 7 Yuyankichu qanmanta aswan ñawpajta mana pi runa kasqanta, nitaj orqospis kasqanta? 8 Qan yachankichu Diospa pakasqa tukuy yuyayninta? Qanllachu yachayniyoj kanki kay pachapi? 9 Imatá qan yachanki noqayku mana yachasqaykutari? Imatá qan yachashanki noqaykumanta astawanri? 10 Noqayku ukhupi aswan machu runas kanku, tataykimanta aswan ñawpajta nacejkuna. 11 Qampajqa pisichu Diospa sonqochasqanqa, munakuywan k'achata parlasusqaykupis? 12 Imaraykutaj sonqoyki allin kajmanta karunchachisunkiri? Imaraykutaj jinata ñawiyki leqhoykachanri? 13 Imaraykutaj jinatapuni Diospaj phiñakunkiri? Imaraykutaj mana sayk'uspa rimallankipuni? 14 Imataj runa kasqa mana juchayojpuni kanampajri? Warmimanta nacesqa runaqa, imaynatataj cheqan kanmanri? 15 Diospa angelesnimpis mana atienekunapaj jinachu kanku. Diospa rikuynimpeqa janaj pachapis mana llimphuchu. 16 Astawanraj mana atienekonqachu juchasapa millay runapeqa, mayqenchus sapa p'unchay juchata ruwashan yakutapis ujyashanman jina, chaypeqa. 17 Uyariway, noqa willasqayki imatachus kawsayniypi rikusqayta. 18 Imatachus yachayniyojkuna yachachiwasqaykuta, imatatajchus paykuna ñawpa tatasninkumanta yachaqakusqankuta willasqayki. 19 Paykunallaman kay jallp'a qosqa karqa, paykunawantaj waj runasqa mana chajrukorqankuchu. 20 Kallpanman atienesqa sajra runaj kawsaynenqa pisilla, nanaywantaj junt'a. 21 Manchariy sonaykuna ninrimpi uyarikun; ni imamanta llakiyniyoj karishajtin, suwaspis kapuyninta suwarparinku. 22 Payqa mana yuyanñachu chay laqhayaymanta llusp'iyta; cuchilloqa suyashallan ima ratopis payta wañuchinampaj. 23 Ayanqa suweq'araspa mikhunan kanqa; payqa yachan mana allinman chayananta. 24 Llakiywan, phutikuywan payta mancharichinku; paypa contrampi oqharikunku, reyespis wañuchinaku maqanakupaj wakichikushankuman jina. 25 Chay imasqa kashan pichus Diospa contranta oqharikojpaj, pichus Tukuy Atiyniyojwan churanakuyta munajpaj. 26 Chayqa kashan pichus jark'akuna escudowan pakasqa kashan, machu machuykachaspa Diospa contranta sayaykojpaj. 27 Paypa uyanqa wiramanta llosq'olla; ñañu wasampis wiramanta mat'illa. 28 Thuñisqa llajtaspi tiyakonqa, ch'in raqay wasipitaj, loqhesqa wasipi, rumi loqhollamanña tukushaj wasipi. 29 Mana unaypajchu qhapaj kanqa, chay kapusqampis mana miranqachu. 30 Laqhayaymanta mana ayqeyta atenqachu. Imaynatachus sach'aj ijimusqanta ujllata nina q'asparparin, jinallatataj paypis rupharparenqa, t'ikantapis wayra apakaponqa. 31 Ama wampu jina ch'awkiyaypi atienekuchunchu, imaraykuchus ch'awkiyachikuyllata tarenqa. 32 Manaraj imapi ramasnin ch'akiranqa, manañataj ujtawan q'omeryanqachu. 33 Mana poqoyta atej uva sach'a jina kanqa; olivoj t'ikasnin jina t'akarakonqa. 34 Juchasapasqa mana wawasniyoj kanqanku. Lluk'i tantasqankuwan wasi ruwasqankuta nina q'olaykonqa. 35 Sajra kajwan wijsallisqa kanku, juchatataj wachanku. Sonqonkupeqa ch'awkiyayllata wakichikunku, nispa nerqa Elifazqa.
