1 Warmimanta nacesqa runaqa pisillata kawsan, kawsaynintaj imaymana llakiykunawan junt'a kashan. 2 Ujllata t'ika jina phancharparin, chaymantataj wañuykapun, llanthu jinataj chinkapun. 3 Chay rijch'aj runatachu cuentaman churaspa, paypa contranta uj pleitota sayarichinki? 4 Pitaj ch'ichi kajmanta llimphu kajta orqhonmanri? Ni pipis atinchu. 5 Cheqamanta runaj watasnenqa yupasqalla kanku; mashkha killastachus kawsananqa nisqaña kashan. Qanqa ninki mayk'ajkamachus kawsananta, chaytataj mana pasayta atinchu. 6 Amaña payta qhawaychu, saqey kawsajta. Saqellayña uj peón jina ruwananta tukushajta. 7 Uj sach'a k'utusqa kaspa, atinraj ijimuyta, mosoj ramasnintaj mana faltanqachu. 8 Saphisnin jallp'a ukhupi machusña kajtimpis, k'ulluntaj phunusqaña kanman chaypis, 9 yaku chayajtenqa, q'omeryamullanqataj; wawa sach'ajta jina ramasnenqa wiñamullanqapuni. 10 Runatajrí, wañupun mana ujtawan rikhurimuyniyojta. Chantá wañuspaqa, maymantaj rin? 11 Mama qochapi yakusqa ch'akiykapuyta atin, jinallataj mayuspis. 12 Cielo kanankamarí, runaqa mana jatarimonqachu maypichus p'ampakusqanmanta; puñusqanmanta mana rijch'arimonqachu. 13 Allin kanman ukhu pachaj atiynimpi pakaykunawayki, sinch'i phiñakuyniyki thasnukunankama. Chantá niwankiman mayk'ajchus ujtawan noqamanta yuyarikunawaykita. 14 Sichus uj runa wañun chayqa, ujtawan kawsanmanchu? Tukuy kawsayniypi suyashayman, kay tukuy llakiyniymanta sonqochasqa kanaykama. 15 Qan wajyariwankiman, noqataj uyariykiman. Munakuywan qhawawankiman, imaraykuchus ruwawajniy kanki. 16 Sichus kunan thaskisqasniyta qhawanki chayqa, juchasniytaqa mana qhawawajchu. 17 Manachayqa juchasniyta qonqayman churawaj, pantasqasniymantataj llimphuchawankiman. 18 Orqospis suchuykamuspa, tukukunku. Chhankaspis maypichus kasqankumanta kuyuchisqa kanku. 19 Yakoqa kallpawan rispa, rumista tukuchin, jallp'atapis apakapun. Ajinata Qampis runaj suyakuyninta chinkachinki. 20 Qanqa payta wiñaypaj atipanki, kay pachamantataj wijch'unki. Uyanta waj jinaman tukuchinki, paytataj kacharpayanki. 21 Wawasnin jatumpaj qhawasqa kajtinkupis, payqa mana yachallampischu. Llakiyman chayanku chaypis, payqa mana reparanchu. 22 Paypa cuerpon nanasqallanta reparakun, imaynatachus ñak'arisqantawan, nispa nerqa Jobqa.
