JOB 12

1Chantá Jobqa chayman kutichispa, nerqa: 2Cheqamanta qankunaqa tukuy runaspa simin kankichej; wañojtiykichej, yachaypis qankunawan khuska wañullanqataj. 3Chaywampis, qankuna jinallataj noqapis yachani; qankunamantaqa mana imapipis pisichu kani. Pitaj mana yachanchu kay tukuy imastari? 4Noqaqa mana juchayoj, nitaj k'amina kani. Ñawpa tiempospi Diosqa mañakusqasniyta uyariwaj, kunantajrí kawsaqesniypa asikunanku kani. 5Pichus allimpi kajqa mana allimpi kajta pisipaj qhawan, jinataj pichus urmaykunampaj jinaña kajtaqa ni imamanta dakuspa astawan tanqaykun. 6Suwasqa wasisninkupi allimpi kawsakunku, Diospa contrampi rimajkunataj ni imamanta manchachikuspa tiyakunku, Diosqa makinkupi kasqanta yuyaspa. 7Animalesta tapuriy, paykunataj yachachisonqanku; jinallataj phawajkunata tapuriy, paykunapis rikuchisonqanku. 8Chayrí jallp'ata tapuriy; chaypis yachachisonqa. Mama qochapi kaj challwaspis sut'inchasonqanku. 9Kanrajchu pipis kay imasmanta mana yachajqa? Manachu tukuy yachanku Dios tukuy imata makisninwan ruwasqantaqa? 10Tukuy kawsajkunaj kawsayninkoqa Diospa makimpi kashan, jinallataj tukuy runaspa kawsayninkupis. 11Cheqamanta ninreqa reparan pejpa parlayninchus kasqanta, jinallataj simipis reparan imayna mikhunachus kasqanta. 12Machu runasqa sumaj yachayniyoj kanku, unayta kawsasqallankutaj paykunaman yachachin. 13Atiywan, yachaywanqa Diospi kashan; yuyaywan, yuyaychaywampis Paypata. 14Diospa urmachisqantaqa ni pipis watejmanta sayariychiyta atinchu. Diospa jap'isqantaqa ni pipis kacharichiyta atinchu. 15Sichus Pay mana parachimun chayqa, tukuy ima ch'akipun. Sitajchus ujllapi parachimun chayqa, jallp'atañataj yaku p'ampaykun. 16Atiywan, yachaywanqa Diospi kashan. Ch'awkiyaj, ch'awkiyachikojpis makimpi kashan. 17Diosqa yachayniyojkunaj yachayninkuta chinkachichin; juezkunatapis locoyachin. 18Diosqa sajra reyestapis mana atiyniyojta rikhurichin, manachayqa q'alasllata waj nacionesman presosta apachin. 19Sacerdotesta ruwanankumanta wijch'un; atiyniyoj kamachejkunatapis chaymanta urmachin. 20Atienekunapaj jina sumaj yuyaychajkunatapis mana parlarejta saqen; kurajkunamantapis sumaj yuyayninkuta qhechun. 21Sumaj runaspaj qhawasqa kajkunata manakajpaj qhawachin, sinch'i kallpayojkunatataj mana kallpayojta saqen. 22Diosqa mana jayk'ajpis rikukoj kajta sut'iman rikhurichin, tukuy ima pakasqa kaj imastataj sut'iman orqhon. 23Payqa nacionesta ashkhayachin, chantá Payllataj chinkachin. Nacionesta ch'eqerachin, Payllataj tukuynejmanta paykunata tantaykun. 24Diosqa uj nacionmanta kurajkunaj yuyayninkuta qhechun. Mana mayman riy atina ch'in pampapi pawichin. 25Chaypi llankhaykachaspa laqhapi jina purinku; machasqasta jina kayman jaqayman chankaykachachispa purichin.

will be added

X\