JOB 10

1Sonqoyqa kay jina kawsaymanta sayk'usqaña kashan. Tukuy llakiyniymanta parlarisaj; atisqayta parlasaj llakiy kawsayniymanta. 2Diosmantaj nisaj: Ay, Diosníy, ama juchachawaychu ari; niway ari imamantachus juchachawasqaykita. 3Qanmin ruwawarqanki; kunantaj allinchu rijch'asunki kay jinata ñak'arichiwaspa, pisipaj qhawarparinawayki? Sajra runaspa yuyasqankuta yanapaytachu munanki? 4Imaynatachus runa qhawan, ajinatachu Qan qhawanki? 5Qampa kawsayniykeqa runaspata jinachu, watasniykipis wañoj runaspata jinachu? 6Jina kajtenqa, ima nispataj purinkiri millay juchasniyta, sajra ruwasqasniytawan mask'aspari? 7Yachanki mana juchayoj kasqayta, yachallankitaj, Qampa atiyniykimanta ni pipis qhechuwayta atisqanta. 8Qanqa kikin makisniykiwan ruwawarqanki. Kunantajrí chinkachiwayta munanki. 9Yuyarikuy ari t'urumanta ruwawasqaykita. Kunanqa jallp'allamantajchu tukuchiwanki? 10Qanqa cuerpoyta ruwarqanki, imaynatachus leche cuajakojtin, queso ruwakun, jinata. 11Qanqa p'achallichiwarqanki aychawan, qarawan; tullusniytapis ankuswan t'inkirarqanki. 12Kawsayta, khuyakuyta ima qowarqanki, k'achata qhawawaspataj, kawsachiwarqanki. 13Chaywampis kay imastaqa sonqollaykipi waqaychasharqanki, yachanitaj chaytapuni ruwayta munasqaykita. 14Qanqa allinta qhawashawarqanki, juchallikonqachus, manachus, nispa, ajinamanta juchallikojtiy, juchachanawaykipaj. 15Sichus juchayojpuni kani chayqa, chinkasqa kani. Sichus mana juchayoj kani chayrí, manallataj kusikuyta atinichu, imaraykuchus Qanqa k'umuykachachiwanki, ñak'arichiwankitaj. 16Sichus umayta oqharini chayqa, Qanqa león jina jap'iwankipacha. T'ukuna imasta ruwanki chinkachinawaykirayku. 17Contrayta willasojkunaqa tiyampuni, k'ajaj phiñakuyniykitaj astawan yapakushan contrayta. Mana sayk'uspa tropa soldados jina qhatiykachawanki. 18Imapajtaj mamaypa wijsanmanta orqhowarqankiri? Kikimpi wañuyman karqa, manaraj pipis rikushawajtin. 19Chinkapullayman karqa, manapis jayk'aj kaymanchu karqa jina. Mamaypa wijsallanmanta covachaman yaykupuyman karqa. 20Pisi watasta kawsanay kashajtenqa, saqeway ari samarikojta, saqeway ari uj chhikallantapis kusikojta, 21amaraj mana jayk'aj kutimuyniyojta ripushajtiy laqha, wañuy llanthu llajtaman. 22Chayqa uj laqha jallp'a, maypichus mana imapis rikukunchu, chay; chaypi kaj k'anchaypis kay tuti laqha jinallataj, nispa nerqa Jobqa.

will be added

X\