1 Kaymin chay willayqa, mayqentachus Tata Diosqa Jeremiasman parlarqa, chay filisteosta imaschus qhatirinanmanta. Kayqa willakorqa Faraón manaraj Gaza llajtata jap'ishajtin: 2 Tata Diosqa kay jinata nin: Wichaynejmanta yaku junt'aykamonqa, imaynatachus mayumanta wasaykuspa tukuynin jallp'ata, tukuynin chaypi kaj llajtasta, chaypi kaj chhikatawan p'ampaykun, ajinata. Tukuy chay jallp'api tiyakojkunaqa qhaparenqanku. Runaspis nanaywan waqanqanku, 3 caballospa corresqanta uyarispa, carretaspa sonasqanta, jinataj ruedaspa purisqantapis. Tatasqa wawasninkuta mana qhawanqankuchu, kallpanku pisiyasqanrayku. 4 Filisteosta chinkarparichina p'unchay chayamunña, Tiromanta, jinataj Sidonmanta yanapajninkuta qhechunapaj, chay p'unchaypis. Arí, Tata Diosqa filisteosta tukuchenqa, Creta churupi llajtamanta yaykumojkunata. 5 Gaza llajtamanta runasqa chujchasninkuta ruthukonqanku. Ascalón llajtaqa ch'impacha qhepakonqa. Qankuna jatunkaray ñawpa runasmanta puchojkuna, mayk'ajkamataj cuerposniykichejta q'allurakunkichej llakiyniykichejta rikuchispari? 6 Ay, Tata Diospa espadan, mayk'ajllañataj samarikunkiri? Jallch'anaykiman yaykupuy; amaña kuyukuspa, kakullay. 7 Chantá imaynatataj mana kuyukuspa qhepakunman, Tata Diospuni Ascalonpa contranta, jatun qocha kantupi kajkunaj contrankutapis kachashajtin?
