1 Tata Diosqa Jeremiasman parlarqa naciones imaynachus kanankumanta. 2 Kaymin Egiptomanta chay willayqa. Kay willayqa parlan Egiptomanta rey Faraón Necaojpa soldadosnimpa contrankupi, pikunachus Éufrates Mayu qayllapi kasharqanku chay Carquemis llajtapi, chaykunaj contrankupi. Paykunataqa Babiloniamanta rey Nabucodonosorqa atipaykorqa Josiaspa churin Judamanta rey Joacim tawa watastaña kamachishajtin. 3 Jark'akuna escudosta wakichiychej. Wañuchinaku maqanakuman puririychej. 4 Caballosta sinchaykuychej. Caballospi purejkuna, lloq'aykuychej. Monterasniykichejta churakuspa, sinrulla sayaychej. T'ojsina lanzasniykichejta filochaychej; fierro pecherasta churakuychej. 5 Jinapis imatataj rikuniri? May mancharikuywan kutiripunku. Soldadosninkoqa atipasqa kaspa, ch'eqeranku, usqhay usqhaytataj ayqeranku, qhepata mana qhawarikuspa. Tukuynejpi mancharikuylla tiyan. Noqa Tata Diosmin chayta nini. 6 Mana chay sinch'i chakispis ayqeyta atinkuchu; aswan kallpayojkunapis mana llusp'iyta atinkuchu. Wichaynejpi Éufrates Mayu qayllapi misk'akunku, urmankutaj. 7 Pitaj wiñan chay Nilo Mayu jina, sinch'i correj yakusniyoj jinari? 8 Chayqa Egiptomin, Nilo Mayu jina wiñajqa, sinch'ita correj yakusniyoj mayu jina. Egiptoqa nin: Astawan wiñaykuspa, jallp'ata p'ampaykusaj. Llajtasta, chaypi tiyakojkunatawan phiriykusaj, nispa. 9 Caballospi rejkuna, ñawpajman phawariychej. Carretaspi kajkuna, ñawpajman imata jina riychej. Soldados, puririychej, Etiopiamanta, Libiamantawan jark'akuna escudoswan wakisqa soldados kajkuna, Lidiamanta kaj soldados, flechanapaj arcosta allinta apaykachajkunapis. 10 Chaymin Tukuy Atiyniyoj Tata Diospa p'unchaynin kanqa, chay p'unchaypi Pay tukuy enemigosninwan pagachikunampaj. Espadaqa manaña atinankama t'ojsenqa, paykunaj yawarninkupitaj wayt'anqa. Tukuy Atiyniyoj Tata Diosqa maytapuni paykunata wañurachenqa wichaynej jallp'aspi, Éufrates Mayu qayllapi. 11 Egipto nación, sipas jina Galaadman wichariychej jampita mask'aspa. Qhasi manakajllata ashkha jampista ujyanki; manaña qampajqa jampi kanchu. 12 Naciones yachankuña may k'umuykachachisqa kasqaykita; tukuy kay pachapi qhaparisqayki uyarikun. Wañuchinaku tinkupi maqanakojkuna ujkuna ujkunawan takanakunku, iskayninkutaj urmanku. 13 Tata Diosqa profeta Jeremiasman parlarqa, maypachachus Babiloniamanta rey Nabucodonosor Egiptowan maqanakoj risharqa chaypacha. 14 Kayta willaraychej Egiptopi, Migdolpi, Menfispi, Tafnespipis: Sayarispa, wakichisqa kaychej, imaraykuchus espadaqa muyuyniykichejpi t'ustita ruwanqa. 15 Imaraykutaj Apis nisqa toro lantiykichej ayqerqari? Imaraykutaj sayasqallapi mana kakuyta aterqachuri? Imaraykuchus Tata Diosmin payta urmacherqa, chayrayku. 16 Soldadosniyki mashkha kutis misk'akunku; ujkuna ujkunaj patanman urmanku, ninakunkutaj: Kaymanta jaku ripunachej, kutipunachej jallp'anchejman, chay nacekusqanchej jallp'aman. Sinch'i wañuchinaku maqanakumanta ayqenachej, nispa. 17 Chaypacha qhaparikonqanku: Egiptomanta rey Faraonqa ch'ajwallan; tiempompeqa mana imatapis ruwarqachu, nispa. 18 Tukuy Atiyniyoj Tata Dios sutiyoj Reyqa nin: Kawsayniyrayku juraspa nini: Tabor jina, tukuy orqosmanta aswan jatun kaj, Carmelo Orqotaj jatun qocha kantupi may pataman oqharisqa, ajinamin, pichus jamushan, chay enemigoqa. 19 Wakichikuychej, Egiptopi tukuy tiyakojkuna, nacionniykichejmanta presos apasqa kanaykichejpaj. Menfis llajtaqa ch'inman tukuchisqa kanqa ni pi tiyakunampaj jina; raqaykunallaman tukuchisqa kanqa. 20 Egiptoqa vakillaman rijch'akun. Wichaynejmantatajrí uj jatun khanikoj ch'uspi jamuspa, payta khanenqa. 21 Pagasqa soldadosnimpis waka uñas jina wiras kanku. Paykunapis usqhay usqhayllata ayqenqanku mana sayarispa. Ñak'arichisqa kanankoqa chayamunña, castigasqa kananku, chay p'unchaypi. 22 Egiptoqa katari jina silbashaj ayqenqa soldados qayllaykamojtinkukama. Sach'asta k'utojkunapis kankuman jina hachas oqharisqa Egiptoj contranta jamonqanku. 23 Chay sach'asninta k'utukaponqanku, chinkana jina sach'arara kashajtimpis, nispa nin Tata Diosqa. Langostasmanta aswan ashkhas kanku, manataj pipis paykunata yupayta atinchu. 24 May k'achitu Egiptoqa p'enqachisqa kanqa. Jaywaykusqa kanqa wichaynejmanta jamoj runaspa makinkuman. 25 Israelpa Diosnin, Tukuy Atiyniyoj Tata Diosqa nin: Tebaspa diosnin Amonta, Faraonta, Egiptojta dioskunantinta, reyesnintapis castigasaj, jinallataj Faraonpi tukuy atienekojkunatapis. 26 Paykunataqa Babiloniamanta rey Nabucodonosorpa makinman jaywaykusaj, paykunata wañuchiyta munajkunaj makinkuman, jinallataj reypa soldadosnimpa kamachejkunaj makinkumampis. Chaywampis Egiptopi aswan qhepaman ñawpajpi jina runas tiyakapullanqankutaj. Noqa Tata Diosmin chayta nini. 27 Kamachiy Jacob, ama mancharikuychu. Ama sonqoyki llawch'iyachunchu, Israel. Qantapis, wawasniykitapis Noqa kacharichisaj, chay karu jallp'asman presos apasqa karqankichej, chaymanta. Watejmanta allinta kawsakunki ni pejpa ima nisqan. 28 Noqa Tata Diosmin kayta nini: Ama manchachikuychu, kamachiy Jacob, imaraykuchus Noqa qanwan kashani. Maykunamanchus ch'eqeracherqayki, chay tukuy nacionesta phirisaj. Jinapis qantaqa mana chinkachisqaykichu, manachayqa wananaykipaj castigasqayki juchallikusqaykiman jina; mana saqesqaykichu mana castigaspaqa.
