JEREMÍAS 38

1Matanpa churin Sefatías, Pasurpa churin Gedalías, Seleniaspa churin Jucal, Malaquiaspa churin Pasur ima tukuy runaspa ñawpaqenkupi Jeremiasta parlashajta uyarerqanku kay jinata: 2Tata Dios nin: Pichus llajtapi qhepakojqa wañuchinaku maqanakupi wañonqa, chayrí wañuchej onqoywan, chayrí yarqhaywan. Pichus caldeosman ripojrí wañuymanta llusp'enqa, nispa. 3Tata Diosqa nillantaj: Kay llajtaqa Babiloniamanta reypa soldadosnimpa makisninkuman jaywaykusqa kanqa. Paytaj atipaspa, jap'ikaponqa, nispa. 4Chantá chay kurajkunaqa reyman nerqanku: Kay runa wañuchisqa kachun, imaraykuchus chay tukuy nisqasninwanqa, llajtanchejpi qhepakunkuraj, chay soldadosta iskayrayachin, jinataj tukuy runastapis. Kay runaqa mana kay aylloj allinnintachu mask'an, manachayqa mana allin kaynillantapuni, nispa. 5Jinapi rey Sedequiasqa paykunaman kuticherqa: Payqa makisniykichejpi kashan. Noqa mana imatapis ruwayta atinichu qankunamanta payta jark'akunaypaj, nispa. 6Chaypacha paykunaqa Jeremiasta jap'iytawan, reypa churin Malquiaspa pujyunman wijch'uykorqanku, mayqenchus cárcel patio chawpipi karqa, chayman. Ch'ankullaswan urayk'ucherqanku. Chay pujyupeqa mana yaku kasqachu, manachayqa t'urulla kasqa, chaypitaj Jeremiasqa t'uruman chinkaykusharqa. 7Jinapi Etiopiamanta uj runa Ebed-melec sutiyoj reypa kamachinan wasipi kuraj kamachi karqa. Paytaj uyarisqa Jeremiasqa pujyuman wijch'uykusqa kasqanta. Chay ratopi reyqa uj tantakupi kasharqa, Benjamín Punku nisqapi. 8Chaypacha Ebed-melecqa reypa kamachinan wasimanta llojsispa, reywan parlapayamoj rerqa. Payqa nerqa: 9Wiraqochi reyníy, chay runas imatachus profeta Jeremiasta ruwasqankoqa mana walejchu. Paykunaqa uj pujyuman payta wijch'uykunku, chaypitaj yarqhaywan wañonqa, imaraykuchus llajtapi t'antaqa mana kanñachu, nispa. 10Chay ratopacha reyqa Ebed-melecta kamacherqa kinsa chunka runasta pusariykukuspa, Jeremiasta orqhomoj rinanta, manaraj chay pujyupi wañushajtin. 11Ebed-melecqa chay runasta pusariykukuspa, kamachina wasiman rerqa. Chay p'acha jallch'ana cuartomantataj mawk'a p'achasta orqhomuspa, ch'ankullaspi pujyu ukhupi Jeremiasman chayta kachaykorqa, nerqataj: 12Chay p'achasta wallak'uyki uraman churaykukuy chay ch'ankulla ama nanachisunampaj, nispa. Jeremiastaj ajinata ruwarqa. 13Chantá chay runasqa Jeremiasta chay pujyumanta orqhorqanku. Chay qhepata Jeremiasqa cárcel patiollapiña qhepakorqa. 14Rey Sedequiasqa kamacherqa profeta Jeremiasta ñawpaqenman pusamunankuta, Diospa Templompa kinsa kaj punkunnejman. Chaypitaj reyqa payta nerqa: Uj imata tapusqayki; ama imatapis pakaspa, sut'inta willaway, nispa. 15Jeremiastaj reyman kuticherqa: Kutichiykimanchus chayqa, cheqamanta manachu wañuchiwankiman? Sichus uj imatapis umachaykiman chayqa, manallataj kasuwankimanchu, nispa. 16Chantá rey Sedequiasqa pakayllapi uj juramentota Jeremiasman ruwarqa: Pichus kawsayta qowanchej, chay Tata Diospa sutinrayku jurayki: Wañuchinasunkuta mana saqesajchu, nitaj kunampis jaywaykusqaykichu, nispa. 17Chantá Jeremiasqa Sedequiasman nerqa: Israelpa Diosnin, Tukuy Atiyniyoj Tata Dios nin: Sichus Babiloniamanta reypa kurajninkunaman chimpaykapuwaj chayqa, qan, jinataj aylluykiwan salvakunkichej, manataj kay llajtapis ruphachisqachu kanqa. 18Manatajchus paykunaman chimpaykuwaj chayqa, caldeos jamuspa, kay llajtata jap'ikaponqanku, ruphaykuchenqankutaj, qantaj makinkumanta mana llusp'iyta atinkichu, nispa. 19Jinapi Sedequías kuticherqa: Caldeosman chimpapunkuña, chay judiosta manchachikuni, imaraykuchus caldeosqa chay judiospa makisninkuman jaywaykuwankuman ñak'arichinawankupaj, nispa. 20Jeremiasrí kuticherqa: Manapuni judiosman jaywaykusonqankuchu. Kasuy Tata Diospa nisqanta, noqa willashayki, chayta. Ajinamanta allinmin risonqa, wañuymantataj llusp'inki. 21Sichus caldeosman chimpapuyta manapuni munanki chayqa, Tata Dios niwanña imaschus qhatirisunanta: 22Judamanta reypa kamachinan wasipi tukuy qhepakojkuna warmis orqhosqa kaspa, Babiloniamanta reypa kurajninkunaman jaywaykusqa kanqanku. Chay warmistaj kay jinata nenqanku: Qampa aswan sumaj kawsaqesnillaykitaj wasanchasorqanku, atipaykusorqankutaj; chakisniyki t'urupi sat'isqa kashajtin, paykuna saqerparisorqanku, nispa. 23Jeremiasqa reyman nillarqapuni: Tukuynin warmisniyki, wawasniykipis caldeosman jaywaykusqa kanqanku. Qan kikiykipis mana paykunamanta llusp'iyta atinkichu, manachayqa Babiloniamanta reyman jaywaykusqa kanki, kay llajtatataj ninawan kanaykonqanku, nispa. 24Chantá Sedequiasqa Jeremiasman nerqa: Ama pimampis chaymantaqa parlaychu, ama wañuchisqa kanaykipaj. 25Sichus chay kurajkunaqa qanwan parlasqayta yachanqanku chayqa, jamusonqanku, tapusonqankutaj imastachus qan niwasqaykita, noqapis imastachus qanman nisusqayta. Mana qanta wañuchisqaykuchu, nispataj, tukuy imata willanaykita mañasonqanku. 26Jinapis, qanqa kutichinki: Noqa reymanta mañakorqani ama Jonatanpa wasinman kutiykuchinawankuta, ama chaypi wañunaypaj, nispa. 27Jinataj ari, tukuy chay kurajkunaqa Jeremiasman rispa, taporqanku. Paytaj kuticherqa reypa kamachisqanman jina kikinta. Chaypacha paykunaqa mana imanaspalla Jeremiasta saqeporqanku, imaraykuchus mana pipis chay parlasqankutaqa uyarisqachu. 28Jeremiastaj cárcel patiopi qhepakorqa, Jerusalenta jap'inanku karqa, chay p'unchaykama.

will be added

X\