1 Josiaspa churin Judamanta rey Joacim tawa watastaña kamachishajtin, Tata Diosqa Jeremiasman parlaspa, nerqa: 2 Qhelqay uj k'uyuna libroman tukuy kay nisusqayta, Israelmanta, Judamantawan, chantá chay waj nacionesmanta imatachus nerqani, chayta Josiaspa tiemponmanta kunankama. 3 Ichapis Judamanta kaj runasqa ñak'ariykunata apachimunayta uyarispa, tukuy sajra kawsayninkuta saqenkuman, Noqataj sajra ruwasqasninkumanta, juchasninkumantapis paykunata perdonapuyman, nispa. 4 Chantá Jeremiasqa Neriaspa churin Baructa wajyaspa, payta kamacherqa Tata Diospa tukuy nisqanta qhelqananta. Baructaj chay imasta k'uyuna libroman qhelqarqa. 5 Chaymantá Jeremiasqa Barucman nerqa: Noqaqa Tata Diospa Templonman yaykunaymanta jark'asqa kani. 6 Chayrayku jamoj ayuno p'unchaypaj rispa, chaypi qan jatunmanta, kay qhelqacherqayki, kay librota leeykuy, jinamanta Jerusalenpi tiyakojkuna, jinataj Judapi kaj llajtasmanta jamojkunapis Tata Diospa nisqanta uyarinankupaj. 7 Ichapis Tata Diosmanta mañakunkuman, sajra ñanninkumantataj kutirikunkuman, imaraykuchus Tata Diospa k'ajaj phiñakuynenqa may jatunmin, mayqentachus Tata Dios contrankuta apachimunanta nerqa, chay, nispa nerqa Jeremiasqa. 8 Chantá Neriaspa churin Barucqa profeta Jeremiaspa tukuy kamachisqanman jina ruwarqa: Tata Diospa Templonman rispa, chay k'uyuna libropi Tata Diospa nisqan qhelqasqasta jatunmanta leerqa. 9 Josiaspa churin, Judamanta rey Joacim, phishqa watastaña kamachishajtin jisq'on kaj killampi kamachisqa karqa Jerusalenpi tukuy tiyakojkuna, jinataj Judapi waj llajtasmanta jamojkunapis Tata Diospa ñawpaqempi ayunota ruwanankuta. 10 Baructaj Diospa Templompa pata kaj pationman rerqa, Mosoj Punku chaynejman. Jinapi Safanpa churin reypa qhelqerin Gemariaspa cuarton chaynejmantapacha, tukuy runaspa uyarinanta leeykorqa, maypichus Jeremiaspa nisqasnin qhelqasqa kasharqa, chay libromanta. 11 Gemariaspa churin Safanpa allchhin Micaiasqa Baructa uyarerqa Tata Diospa nisqanta leeshajta. 12 Chaymantataj, reypa kamachinan wasipi qhelqerejpa cuartonman rerqa, maypichus kay tukuy kurajkunaqa tantasqa kasharqanku, chayman: Reypa qhelqerin Elisama; Semaiaspa churin Delaía; Acborpa churin Elnatán; Safanpa churin Gemarías; Ananiaspa churin Sedequías, jinataj chay waj kurajkunapis. 13 Chantá Micaiasqa willarqa libromanta imatachus Baructa leeshajta uyarisqanta Judamanta tukuy runaspa ñawpaqenkupi. 14 Chantá reypa wasimpi kurajkunaqa Jehudita kacharqanku; payqa karqa Netaniaspa churin, Selemiaspa allchhin, Cusij allchhimpa allchhintaj. Payta kacharqanku Barucman nimunampaj: Runaspa ñawpaqenkupi leesharqanki, chay librota apamuy, nispa. Baructaj libro aparisqa ñawpaqenkuman jamorqa. 15 Paykunataj nerqanku: Tiyarikuy, chay librotataj leeripuwayku, nispa. Baructaj leeriporqa. 16 Chayta uyariytawankama, may mancharisqas ujkuna ujkunaman ninakorqanku: Chay tukuy imastaqa reyman willananchej tiyan, nispa. 17 Chaymantá Baructa taporqanku: Willariwayku ari imaynatachus kay tukuy imasta qhelqasqaykita, nispa. 18 Baructaj kuticherqa: Jeremías kikimpuni kay tukuyta niwarqa, noqataj chay tukuy niwasqanta tintawan kay k'uyuna libroman qhelqani, nispa. 19 Chaypacha Barucman nerqanku: Qanwan, Jeremiaswan rispa pakakamuychej, amataj pipis yachachunchu maypichus kasqaykichejta, nispa. 20 Chay kurajkunaqa reypa qhelqerin Elisamaj cuartonman chay k'uyuna librota saqespa, kamachina wasiman rerqanku chay tukuymanta reyman willamunankupaj. 21 Chayta uyarispa, reyqa kacharqa Jehudita, reypa qhelqerin Elisamaj cuartonmanta chay k'uyuna librota apamunampaj. Jehuditaj librota apamuytawan, reypa uyarinanta leerqa, jinataj tukuy chay kurajkunaj uyarinankutapis. 22 Jisq'on kaj killapi kasqankurayku reyqa chirimanta pakakuna cuartompi, nina k'ajajpa ñawpaqempi q'oñikuspa kasharqa. 23 Chantá Jehudi kinsa, chayrí tawa t'aqastaña leejtinkama, reyqa cuchillowan chay leesqan chaynejta khuchuspa, ninaman wijch'uykorqa. Chayta jinallatapuni ruwasharqa ninapi ruphasqa chay k'uyuna libro tukukunankama. 24 Nitaj rey, nitaj reypa yanapajninkunamanta uyarejkunapis chay libro leekusqanwanqa mancharikorqankuchu, nitaj uj chhikanta sonqonkuta nanachikojmampis rijch'akorqankuchu. 25 Elnatán, Delaía, Gemarías imalla reyman parlapayarqanku ama chay librota ruphachinampaj, paytajrí manapuni kasukorqachu. 26 Manachayqa reypa churin Jerameelta, Azrielpa churin Seraiasta, Abdeelpa churin Selemiasta ima kamacherqa presochanankuta Jeremiasta, qhelqerin Baructawan. Tata Diostajrí paykunata pakaykorqa. 27 Jeremiasqa Barucwan qhelqacherqa, chay librota rey ruphachejtinkama, Tata Diosqa Jeremiasman parlaspa, nerqa: 28 Waj k'uyuna librota jap'ispa, qhelqay imachus chay ñawpaj libropi kasharqa, chayta, mayqentachus Judamanta rey Joacim ruphacherqa, chayta. 29 Kaytapis nillaytaj Judamanta rey Joacimman: Tata Diosqa nin: Qanqa chay k'uyuna librota ruphacherqanki, Jeremiastataj k'amerqanki kay jinata qhelqasqanmanta; Babiloniamanta reyqa jamonqapuni kay nacionta chinkachinampaj nitaj uj runapis nitaj uj uywallapis puchunankama, nispa. 30 Kunanqa Noqa Tata Dios kayta nini Judajpa reynin Joacimmanta: Paypa mirayninmanta Davidpa kamachina tiyanampi tiyaykojqa mana kanqachu. Ayanqa ruphaypitaj, chiripitaj wijch'urayanqa. 31 Payta, jinataj mirayninta, kamachisnintapis juchasninkumanta castigasaj. Paykunaj patankuman, Jerusalenpi tiyakojkunajman, Judapi tiyakojkunajmampis tukuy laya ñak'ariykunata apachimusaj, apachimunay karqa, chaykunata, imaraykuchus qankunaqa nisqasniyta mana kasorqankichejchu, nispa nerqa Tata Diosqa. 32 Chantá Jeremiasqa waj k'uyuna librota jap'ispa, qhelqerin Barucman jaywarqa. Paytaj qhelqarqa Jeremiaspa tukuy parlasqanta, mayqenchus rey Joacimpa ruphachisqan libropi qhelqasqa karqa, chay tukuyta. Jeremiastaj waj ashkha imastawanraj chay ñawpaj qhelqasqanman yapaykorqa.
