JEREMÍAS 35

1Josiaspa churin Joacim Judapi rey kashajtin, Tata Diosqa Jeremiasman parlaspa, nerqa: 2Recabitaspa ranchonkuman rispa, paykunawan parlamuy. Chaymanta Temploypi ujnin kaj cuartoman pusaspa, paykunaman vinota ujyachiy, nispa. 3Chantá noqa Jeremiasqa recabita ayllumanta kajkunata pusamoj rerqani: Habasiniaspa allchhin Jaazaniasta, pichus chay waj Jeremiaspa churin kajta, wawqesninta, churisninta, tukuynin ayllusninta ima. 4Chantá Diospa Templonman paykunata pusaykorqani, Igdaliaspa churin Hananpa churisnimpa tiyakunanku cuartosman. Payqa Diospa kamachin karqa. Chay cuartoqa karqa Diospa Templonta qhawajkunaj tiyakunanku qayllapi, Salumpa churin Maasiaspa cuarton patapi; payqa Templo punkuta qhawaj karqa. 5Chantá recabitasman vasospi vinota jaywaspa, nerqani: Kay vinota ujyaykuychej, nispa. 6Paykunatajrí kutichiwarqanku: Noqaykoqa vinota mana ujyaykuchu, imaraykuchus Recabpa churin ñawpa tatayku Jonadab kamachiwarqayku mana jayk'ajpis vinota ujyanaykuta noqayku, nitaj mirayniykupis. 7Ajinallatataj kamachiwarqayku wasistapis ama ruwakunaykuta, nitaj chajrasta tarpunaykuta nitaj uva sach'astapis plantakunaykuta. Kamachiwarqaykutaj toldosllapi tiyakunaykuta, ajinamanta kay jallp'api unayta tiyakunaykupaj, maypichus forasteros jina purishayku, chaypi. 8Noqaykoqa kasullarqaykupuni Recabpa churin ñawpa tatayku Jonadabpa tukuy kamachiwasqasniykuta. Noqaykoqa mana jayk'ajpis vinota ujyaykuchu, nitaj warmisniykupis, nillataj wawasniykupis. 9Manallataj wasistapis ruwakuykuchu, nillataj uva huertasniykupis kanchu, nitaj tarpuna jallp'asniykupis. 10Toldosllapi tiyakuyku, chay ñawpa tatayku Jonadabpa kamachiwasqaykuta junt'aspa. 11Jinapis maypachachus Babiloniaj reynin Nabucodonosor kay jallp'aman yaykuykamorqa chaypacha, nerqayku: Jaku Jerusalenman rinachej caldeo soldadosmanta, arameo soldadosmantapis pakakunanchejpaj, nispa. Chayraykumin Jerusalenpi tiyakushayku, nispa nerqanku recabitasqa. 12Chaypacha Tata Diosqa Jeremiasman parlaspa, nerqa: 13Noqa, Israelpa Diosnin Tukuy Atiyniyoj Tata Dios kamachiyki rispa nimunaykita Judapi, Jerusalenpiwan kaj runasman: Kay recabitas ruwasqankumanta yachaqakuychej kamachisqasniyta kasukuyta. Noqa Tata Diosmin kayta nini: 14Recabpa churin Jonadabpa miraynenqa mana vinota ujyana kamachiyninta junt'anku. Paykunaqa kunan p'unchaykama mana vinota ujyankuchu, imaraykuchus ñawpa tatankoj kamachisqasninta junt'ashanku. Noqapis qankunaman kutin kutinta parlapayarqaykichej, jinapis qankunaqa mana kasuwankichejchu. 15Qhepampi qhepampi tukuy kamachisniy profetasta kachamorqaykichej ninasuykichejpaj: Jucha ruwasqasniykichejta, sajra kawsayniykichejta ima saqeychej. Ama waj dioskunaj qhepankuta ripuychejchu, nillataj paykunata sirviychejchu. Kay nisqaytachus kasuwankichej chayqa, qankunaman, jinataj ñawpa tatasniykichejmampis qosqay jallp'api tiyakullankichejpuni, nispa. Chaywampis qankunaqa manapuni kasuwarqankichejchu, nitaj nisqasniyta junt'arqankichejchu. 16Recabpa churin Jonadabpa miraynenqa ñawpa tatankoj kamachisqanta kasunkupuni. Kay Israel ayllurí mana kasuta ruwawanchu. 17Chayrayku Noqa, Israelpa Diosnin, Tukuy Atiyniyoj Tata Diosqa nini: Noqa Judajpa patanman, Jerusalenpi tiyakojkunaj patankumampis, willacherqani, chay ñak'ariykunata urmachimusaj. Noqa parlapayarqaykichej, qankunatajrí mana kasuwarqankichejchu; wajyarqaykichej, manataj uyariwarqankichejchu, nispa nerqa Tata Diosqa. 18Chaypacha Jeremiasqa recabitasman nerqa: Tukuy Atiyniyoj Señor Tata Diosqa nin: Qankunaqa kasorqankichej ñawpa tataykichej Jonadabpa kamachisqanta, yachachisqasninta ima, junt'arqankichejtaj tukuy paypa nisqasninta. 19Chayrayku Noqa Israelpa Diosnin, Tukuy Atiyniyoj Tata Diosqa cheqamanta niykichej: Jonadabpa ayllunmanta kallanqapuni uj qhari ñawpaqeypi kamachisqayta ruwanampaj, nispa.

will be added

X\