1 Babiloniaj reynin Nabucodonosorqa Joacimpa churin, Judamanta rey Jeconiasta, Judamanta kurajkunatawan khuska, chantá artesanostawan, herrerostawan ima waj nacionman presosta apacherqa. Chaymanta qhepata Tata Diosqa rikuchiwarqa iskay canastasta higosniyojta, Diospa Templompa ñawpaqempi churasqasta. 2 Ujnin canastaqa sumaj poqosqa higosniyoj karqa, ñawpajta poqojkunamanta. Chay ujninrí mana allin poqosqa higosniyoj karqa, may millay mana mikhunapaj jinachu. 3 Chantá Tata Dios tapuwarqa: Jeremías, imatataj rikunkiri? nispa. Noqataj nerqani: Higosta rikuni. Chay sumaj poqosqa kajkunaqa may sumachajpuni kanku, chay mana walej kajkunarí mana mikhunapaj jinachu kanku, nispa. 4 Chantá Tata Dios parlawaspa, niwarqa: 5 Noqa Israelpa Señornin Tata Dios kayta nini: Chay sumachaj poqosqa higosta jina Judá ayllutaqa allimpaj qhawasaj, mayqenkunatachus kaymanta caldeospa jallp'ankuman presos apachisqasniyta. 6 Paykunataqa waqaychasaj, kay jallp'amantaj kutichimusaj. Kaypajqa paykunata allinta sayachisaj, manañataj urmachisajchu; paykunata plantaykusaj, manañataj jayk'ajpis paykunata t'irasajchu. 7 Allin sonqota paykunaman qosaj, Noqa Tata Dios kasqayta rejsinawankupaj. Paykunaqa aylluy kanqanku, Noqataj paykunaj Diosninku kasaj, imaraykuchus tukuy sonqowan kutimpuwanqanku. 8 Judamanta rey Sedequiasta, kurajninkunata, Jerusalenpi qhepakojkunata, chay waj tiyakojkunata, Egiptoman tiyakoj rejkunata ima, chay mikhunapaj mana allinchu kaj higosta jina qhawasaj. 9 Paykunata mancharikunapaj jina ruwasaj tukuy kay pachapi kaj nacionespa ñawpaqenkupi, p'enqakunankupaj jina, cuentakunankupaj jina, asikunankupaj jina, maldición kanankupaj jina, maymanchus paykunata presosta apachisaj, chay nacionespi. 10 Paykunaman wañuchinaku maqanakuta, yarqhayta, wañuchej onqoytapis apachimusaj, ni uj puchuyoj kay jallp'api tukukunankukama, mayqentachus paykunaman, chantá ñawpa tatasninkumampis qorqani, chaypi.
