JEREMÍAS 19

1Tata Dios niwarqa: Rispa, rantimuy uj p'uñuta, wajyaytaj kay llajtamanta wakin kurajkunata, jinataj wakin kuraj sacerdotestawan. 2Chaymantataj paykunawan khuska riychej Ben-hinom Valleman, K'analla Punku nisqa qayllaman, chaypitaj willanki, imatachus willasqayki, chayta. 3Niy: Judamanta reyes, Jerusalenpi tiyakojkunapis, Tata Diospa nisqanta uyariychej: Ajinata nin Israelpa Diosnin Tukuy Atiyniyoj Tata Diosqa: May jatun ñak'ariyta kay cheqaman apachimusaj; pikunachus kay willayta uyarejkunaqa mana ima niyta atishaj qhepakonqanku. 4Chayta ruwasaj, imaraykuchus kay runasqa saqerpariwarqanku, kay cheqatataj mana rejsisqa dioskunaj jallp'ankuman tukucherqanku. Kaypeqa chay dioskunaman inciensota q'oshñicherqanku, mayqenkunatachus mana tatasninku, ni paykuna, nitaj Judamanta reyespis rejserqankuchu, chaykunaman. Chantá kay cheqapi mana juchayoj runaspa yawarninkutapis jich'allarqankutaj. 5Chantataj altaresta sayaricherqanku, wawasninkuta chaypi Baalpaj q'olachipunankupaj. Chayta Noqaqa paykunaman mana kamacherqanichu, nitaj nillarqanipischu, nillataj yuyaynillaypipis karqachu. 6Chayrayku uj p'unchay chayamonqa, chay p'unchaypitaj kay cheqa manaña Tofet sutiwan sutichasqachu kanqa, nitaj Ben-hinom Valle sutiwan, manachayqa Runa Ñak'ana Valle sutiwan rejsisqa kanqa, nispa nin Tata Diosqa. 7Kay cheqapi Noqaqa Judajpa, jinataj Jerusalenpa imatachus ruwanankupaj wakichisqasninkuta chinkachisaj. Saqellasajtaj wañuchejkuna enemigosninku paykunata atipaykunankuta, wañurachinankutataj. Chantá ayasninkuta qosaj suwintusman, k'ita animalesmampis mikhunankupaj. 8Kay llajtata ch'in raqayman tukuchisaj, tukuy t'ukunankupaj jina. Tukuy chayninta purejkunaqa t'ukushaj qhepakonqanku chay jina phirisqa kasqanmanta. 9Jinataj paykunata mikhuchisaj churisninkoj, ususisninkoj aychasninkuta; runas purajmanta mikhunakonqanku chay enemigosninku llajtata atipanapaj muyuykusqankurayku mana imatapis ruwayta atispa, nispa ninki sutiypeqa. 10Chayta niytawankamataj, chay p'uñuta, qanwan kashanku chay runaspa ñawpaqenkupi p'akiy, niytaj: 11Tukuy Atiyniyoj Tata Diosqa ajinata nin: Noqapis kay nacionta, kay llajtatapis p'akisaj, imaynatachus kay p'uñuta p'akikojta rikunkichej, ajinata, manañataj watejmanta jallch'asqa kayta atenqachu. Runasqa ayasta Tofetpi p'ampanqanku chaypi manaña campo kanankama. 12Ajinatamin kay llajtata, chaypi tiyakojkunatapis ruwasaj. Kay llajtataqa Tofet jina kananta ruwasaj, nispa nin Tata Diosqa. 13Jerusalenpi wasista, chantá Judamanta reyespa wasisninkuta ima Tofet jina ch'ichipaj qhawasqa kanqanku. Ajinata ruwasaj, imaraykuchus chay wasis patapi inciensota q'oshñichej kanku tukuy ch'askasman, jinallataj waj dioskunaman vinota jich'aspa jaywaj kanku. 14Chayta niyta tukuytawan, Jeremiasqa Tofetmanta kutimorqa, maymanchus Tata Dios payta kachasqa sutimpi parlamunampaj, chaymanta. Chantá Diospa Templompa patiompi sayaykuspa, tukuy runasman nerqa: 15Israelpa Diosnin Tukuy Atiyniyoj Tata Diosqa nin: Kay llajtaman, tukuy qayllapi kaj llajtasmanwan, ima castigochus jamunan karqa, chayta kachaykamusajpuni, imaraykuchus sonqonkuta rumiyacherqanku, nisqasniyta ama uyarinawankupaj.

will be added

X\