SANTIAGO 5

1Uyariychej qhapajkuna: Qhaparispa, sonqo nanayta waqaychej, qankunaman llakiykuna jamunanmanta. 2Qhapaj kapuyniykichej ismusqa kashan, p'achasniykichejtaj thutasqa. 3Qoriykichej, qolqeykichejpis qhorwariyasqa kashanku, chay qhorwariyasqastaj qankunaj contraykichejpi testigo jina sayanqa, nina jinataj ruphaykonqa tukuy aychaykichejta. Qhapaj kayniykichejta tantarqankichej qhepa kaj p'unchaykunapaj. 4Qankunaqa mana pagarqankichejchu chajraykichejpi cosechata oqharejkunaman, chay ch'awkiyasqaykichej qolqetaj contraykichejpi qhaparimushan. Arí, chay cosecha oqharejkunaj qhaparikusqankoqa chayan Tukuy Atiyniyoj Señorpa ninrisninkama. 5Kay pachapi qankunaqa chhika patapi kawsarikunkichej, aychaykichejpa tukuy munaynintapis junt'aspa, may kusisqas, sonqosniykichejta wirayachispa ñak'ana p'unchaypaj jina. 6Mana juchayoj runasta juchachankichej, wañuchinkichej, paykunataj ch'inmanta wañuchichikusunkichej. 7Chayrayku, hermanos, pacienciakuychej Señor jamunankama. Qhawaychej: Chajrata poqochej runaqa pacienciawan suyan jallp'aj sumaj poqochisqanta, jinallatataj pacienciawan suyan ñawpaj parasta, qhepa parastapis. 8Ajinata, qankunapis pacienciakullaychejtaj. Sonqosniykichejta kallpachaychej, imaraykuchus Señorpa jamuynin qayllamushanña. 9Hermanos, hermanosniykichejpa contranta ama thutuychejchu, ama juchachasqa kanaykichejpaj; juezqa llojsimunampiña kashan. 10Hermanos, yachaqakuychej Diospa sutimpi parlaj profetasmanta. Yuyarikuychej imaynatachus paykuna pacienciakusqankuta, ñak'ariypi kashaspapis. 11Yachanchej jina, pikunachus ñak'ariypi kashaspapis pacienciawan sayajkunata, kusikuyniyoj kasqankuta ninchej. Qankuna uyarerqankichej Job imaynatachus ñak'ariypi mana sayk'uspa sayasqanmanta, Señortaj tukukuypi imatachus paypaj ruwasqanmanta, imaraykuchus Señorqa jatun sonqoyoj, may khuyakuyniyojtaj. 12Hermanosníy, tukuy imamanta astawanqa amapuni juraychejchu, ni janaj pacharayku, nitaj kay pacharaykupis, nillataj waj juramentowampis. Maypachachus arí, ninkichej chaypachaqa, arí kachun; maypachachus mana, ninkichej chaypachaqa, mana kachun, ama juchachasqa kanaykichejpaj. 13Qankunamanta mayqempis llakisqachu kashan? Diosmanta mañakuchun. Mayqempis kusisqachu kashan? Tukuy sonqo takichun Diosta yupaychaspa. 14Qankuna ukhupi mayqellampis onqosqa chayrí sonqompi sayk'usqa kashanman chayqa, iglesiamanta anciano nisqa kurajkunata wajyachun, Diosmanta paypaj mañapunankupaj, Señorpa sutimpi aceitewan jawispa. 15Creespa mañapojtinkutaj, chay runaqa sanoyachisqa kanqa, Señortaj payta sayarichenqa. Sitajchus juchallikorqa chayqa, chay juchampis pampachasqallataj kanqa. 16Chayrayku, purajmanta juchasniykichejta willanakuychej, jinallataj ujkuna ujkunapaj Diosmanta mañapuychej, sanoyachisqa kanaykichejpaj. Cheqan runaj tukuy sonqo mañakuynenqa sinch'i atiyniyojmin. 17Profeta Eliasqa noqanchej jina runalla kaspapis, tukuy sonqo mañakorqa Diosmanta ama parananta, manataj pararqachu kinsa wata sojta killayojta. 18Chantá ujtawan Diosmanta mañakojtin paramorqa, jallp'ataj tukuy imata poqocherqa. 19Hermanosníy, pillapis qankunamanta cheqan ñanmanta karunchakojtin, sichus waj hermano chay karunchakojta allin ñanman kutirichin chayqa, 20kayta yachaychej: Pichus chay karunchakojta kutirichimojqa chay ujpa almanta wañuymanta salvan, ashkha juchastataj pampachan.

will be added

X\