1 Tata Dios niwarqa: Uj jatun tablata jap'ispa, chayman sut'ita qhelqay Maher-salal-hasbaz sutita. 2 Chaytaqa ruway sacerdote Uriaspa ñawpaqempi, Jeberequiaspa churin Zacariaspa ñawpaqempi ima, nispa nerqa Tata Diosqa. 3 Chay qhepata profeta warmiwan puñuykorqani, paytaj wijsallisqa rikhurispa, uj wawata nacechikorqa. Chaypachataj Tata Diosqa niwarqa: Wawaykitaqa Maher-salal-hasbazta sutichay. 4 Chay wawa manaraj, tatáy, mamáy niyta yachashajtin, Asiriaj reynenqa apakaponqa Damascoj qhapaj kayninta, Samariaj tukuy imasnintawan, nispa. 5 Chaymanta Tata Dios ujtawan nillawarqataj: 6 Kay runasqa alliyllamanta rishaj Siloé yakuta qhesachanku, Rezinwan, Remaliaswan kusikunankurayku. 7 Chayrayku, Señorqa paykunaj patankuta ashkha mayu yakuswan llump'irichenqa. Chayqa Asiriamanta rey, tukuy atiyninwan. Chay yakoqa tukuy mayusta atipaspa, tukuy mayu kantusninta wasarenqa. 8 Chayqa Judaman junt'aykonqa, kunkankama chayaspa. Emanuel, tukuynin jallp'aykita ankaj lijrasninwan jina qhataykonqa. 9 Naciones, tantakuychej; qankunaqa chinkachisqa kankichej. Qankunapis karu llajtayojkuna, uyariychej: May jinatapis wakichikuychej; qankunapis chinkachisqallataj kankichej. Imayna armastapis wakichikuychej; chinkachisqapuni kankichej. 10 Sumajtapis yachachinakuychej; qhasi manakajpaj kanqa. Imatapis parlasqaykichejqa manapuni junt'akonqachu, imaraykuchus Diosqa noqaykuwan kashan. 11 Tata Diosqa lijrasniyman makinta churaspa, amapuni kay runaspa ñanninkuta purinaypaj mayta niwarqa: 12 Ama qankunaqa ch'ajwa niychejchu, runas imatapis ch'ajwa kasqanta nejtinkoqa. Amataj qankunaqa mancharikunkichejchu, paykuna imamantapis mancharikojtinkoqa. 13 Tukuy Atiyniyoj Tata Diosllata Santo Kajpaj qhawaychej; Payllata manchachikuychej, Payllata kasuychej. 14 Payqa iskaynin nacionespaj pakakunanku wasi kanqa, manachayqa misk'ana rumi, chaypi urmanankupaj. Jinallataj Payqa misk'ana rumi kanqa, chaytaj iskaynin Israel nacionesta urmachenqa. Payqa ch'ipa jina, tojlla jinataj Jerusalenpi tiyakojkunapaj kanqa. 15 Ashkhas chaypi misk'akuspa, urmaranqanku, sonqonku p'akisqataj kanqanku. Ashkhastaj chay tojllapi urmaspa, ch'ipasqa qhepakonqanku. 16 Kay kamachisqasniyta allinta waqaychaychej. Yachachisqasniypa sonqosninku ukhupi kay yachachisqasniyta sumajta sellaykuychej. 17 Tata Diospi suyakusaj. Payqa Jacobpa mirayninmanta uyanta pakaykun chaypis, Paypi atienekusaj. 18 Noqawan, Tata Diospa qowasqan wawasniywan ima israelitaspaj uj señal jina kayku, Tukuy Atiyniyoj Tata Diospa churasqasnin, pichus Sión Orqopi tiyakun, chaypata. 19 Sichus chay runas nisonqachej: Tapuriychej aysirista, chhichinakuspa parlaj layqasta ima, nispa chayqa, niychej: Manachu runasqa Diosnillankuta tapurikunkuman? Wañusqastarajchu kawsajkunamanta tapurikunkuman? nispa. 20 Chayrayku kutiriychej leyman, imatachus yachachisqaymanwan. Sichus mana chayman jina parlanku chayqa, paykunapaj mana paqarimuy kanchu. 21 Runasqa kayman jaqayman puriykachanqanku phutiypa jarap'asqan, yarqhasqataj. Chay jina yarqhasqa kaspa, paykuna mayta phiñakonqanku, qallarenqankutaj reyninkuta, Diosninkutapis maldeciyta, patata qhawarispa. 22 Jallp'ata qhawarispataj, rikonqanku llakiyllata, laqhayayllata, may waqaytataj, tuti laqha ukhumantaj wijch'usqa kanqanku.
