1 Uziaspa allchhin, Jotampa churin Ajaz Judapi rey kashajtin, Siriamanta rey Rezinwan, Israelmanta Remaliaspa churin Pekapiwan Jerusalenman wicharerqanku maqanakuspa jap'inankupaj, manataj chay llajtata atipayta aterqankuchu. 2 Jinaqa Judapi rey Ajazman willamorqanku: Siriamanta kajkunawan, Efrainmanta kajkunapiwan ujllaman ujchakunku, nispa. Chayta uyarispa, reywan runasninwanqa maytapuni kharkatiterqanku, wayramojtin sach'as kuyunku, jinata. 3 Chantá Tata Diosqa Isaiasta nerqa: Qanwan, churiyki Sear-jasubwan rey Ajazta taripamuychej, Pata Estanquej larq'an tukukun chayman, P'acha T'ajsana Jallp'a ñan pataman. 4 Jinapi payta niy: Allinta qhawakuy, amataj llakikuychu; ama manchachikuychu, nitaj q'ewakuychu chay iskay q'oshñej nina k'aspismanta, Rezinwan, Sirioswan, Remaliaspa churinwan, chaykunaj k'ajaj phiñakuyninkumanta. 5 Siriamanta kajkunawan, Efraín llajtamanta kajkunawan, Remaliaspa churinwan ima qampa contraykipi oqharikushanku, nishankutaj: 6 Judajpa contrampi rinachej; paykunata mancharichimuspa, chay Judá jallp'ata jap'ikapunachej, chaymantaj churamunachej Tabielpa churinta rey kanampaj, nispa. 7 Chaywampis Tukuy Atiyniyoj Tata Dios nin: Chayqa mana kanqachu, nitaj jayk'ajpis junt'akonqachu. 8 Arampa jatun llajtanqa Damasco, Damascoj reynintaj Rezín. Efraínpa jatun llajtanqa Samaria, Remaliaspa churintaj Samariaj reynin. Sojta chunka phishqayoj watasmanta Efraínqa manaña nacionchu kanqa. 9 Efraín naciompa jatun llajtanqa Samaria. Remaliaspa churintaj Samariaj reynin. Sichus qankunapis creesqaykichejpi mana sayankichej chayqa, manallataj sayayta atinkichejchu paykunaj ñawpaqenkupi. 10 Tata Diosqa Ajazman nillarqataj: 11 Señorniyki Tata Diosmanta uj señalta mañakuy, ukhu pachamantapis kachun, chayrí janaj pachamantapis kachun, nispa. 12 Ajaztajrí nerqa: Mana mañakuymanchu, manataj Tata Diostaqa pruebaman churaymanchu, nispa. 13 Chantá Isaías nerqa: Kunanqa uyariychej, Davidpa mirayninmanta kajkuna. Qankunapajqa runasta sayk'uchinaqa pisichu, Diosniytapis sayk'uchiyta munanaykichejpajqa? 14 Kikin Señormin señalta qosonqachej. Qhawariychej, qharej mana chayasqan sipas wijsallikonqa, nacechikuspataj, wawanta Emanuelta sutichanqa. 15 Wawaqa ñojñuta, abeja misk'itawan mikhonqa, mana allin kajta qhesachayta, allin kajtataj ajllayta yachanankama. 16 Wawa manaraj yuyayninman chayashajtin, manchachikushanki, chay reyespa nacionninkoqa saqerparisqa kanqa. 17 Tata Diosqa mana allin p'unchaykunata apachimusonqa qanman, aylluykiman, tataykej wasinman ima. Chay jinataj ni jayk'aj karqachu Efraín ayllu Judá ayllumanta t'aqakusqanmantapacha. Payqa kachaykamusonqa Asiriamanta reyta. 18 Chaypacha Tata Diosqa silbarispa, Egipto karu mayusmanta runasta ch'uspista jina wajyanqa, Asiriamantataj abejasta jina. 19 Chay tukuy jamuspaqa, qolluykukonqanku ch'in wayq'ospi, chhanka jusk'uspi, khishkarara ch'umispi, uywa ujyana qochaspi ima. 20 Chaypacha Señorqa Éufrates Mayu chimpasmanta Asiria reywan, mañarisqa cuchillowan jina israelitasta rasphanqa tukuy chujchasninta, sunkhasninta, tukuy cuerponta ima. 21 Chaypacha runaqa uj wakata, iskay ovejastawan uywakonqa. 22 Ajinamanta lecheqa ashkha kanqa; chayrayku mikhonqanku ñojñuta, abeja misk'itawan chay jallp'api qhepakojkunaqa. 23 Chaypacha waranqa uva sach'asniyoj jallp'aman, waranqa qolqe valejman, khishkarara ch'umi junt'aykonqa. 24 Chaymanqa runas arcoswan, flechaswan ima k'ita animalesta jap'ejlla yaykonqanku, imaraykuchus chay tukuynin jallp'asman khishkarara ch'umis junt'aykonqa. 25 Chay tukuynin lomasta ñawpajtaqa chujchukawan allaj kanku, chayman manaña chayanqankuchu, khishkasta, manchachikuspa. Chayqa kanqa wakasta, ovejasta michinallapajña.
