ISAÍAS 64

1Tata Dios, sichus cielota llik'ispa urayk'amuwaj chayqa, Qampa ñawpaqeykipi tukuy orqos kharkatinkuman. 2Imaynatachus ninaqa ch'awjrata ruphan, mankapi yakutapis t'impuchin, ajinallatataj Qampis jamuy, enemigosniykiman sutiykita rejsichinaykipaj, Qampa ñawpaqeykipi nacionespis kharkatitinankupaj ima. 3Maypachachus Qanqa mana jayk'aj rikusqaykuta rikuchiwarqayku, kayman urayk'amuspa chaypacha, tukuy orqos ñawpaqeykipi manchayta kharkatiterqanku. 4Unaymantapacha mana jayk'ajpis uyarerqankuchu, nitaj rikorqankuchu Qan jina Diostaqa, Qampi atienekuspa suyakojkunapaj ajinata ruwapojtaqa. 5Pikunachus cheqan kajta kusiywan ruwanku, ñankunaykimantataj yuyarikunku, chaykunawan tinkukoj jamunki. Juchallikusqaykumanta Qanqa phiñakorqanki; chay juchasniykupi noqaykoqa unay watasta karqayku. Chantá salvasqa kayta atiykumanchu? 6Tukuyniyku ch'ichipaj qhawasqa runa jina kayku, tukuy ima allin ruwasqaykupis millay ch'ichi thanta jina. Noqaykoqa sach'a laqhes jina qawiyku, sajra ruwasqasniykutaj wayra jina apawayku. 7Sutiykita oqharispa Diosnimpaj rejsikapusojqa mana pipis kanchu, nitaj pipis kallpakunchu Qampi atienekusunampaj. Chayrayku Qanqa uyaykita noqaykumanta pakaykukunki, sajra ruwasqasniykupitaj qawejta qhawakullawayku. 8Chaywampis Tata Dios, Qanmin Tatayku kanki. Noqaykoqa llink'i t'uru jinalla kayku, Qantaj manka llut'aj jina kanki. Chayrayku noqaykoqa tukuyniyku makisniykej ruwasqasnin kayku. 9Tata Dios, ama ari chay jinataqa phiñakuwaykuchu, amataj juchasniykumantaqa yuyarikullaypunichu ari. Tukuyniyku Qampa aylluyki kayku. 10Ajllakusqayki llajtasqa chay jina ch'impachaman tukunku. Sión llajtaqa ch'impacha, Jerusalenpis raqaykunalla kashan. 11May jina k'achitu santo Temployku, maypichus ñawpa tatasniyku Qanta yupaychasorqanku, chayta runasqa ninawan ruphaykuchinku. Tukuy munasqa imasniykoqa phirisqa kanku. 12Chay jinasta ruwashajtinkupis, Qanqa Tata Dios ch'inllachu kakunki? Manachu imatapis ninki? Chantá astawanrajchu llakichiwasqayku?

will be added

X\