1 Sión llajtata munakusqayrayku mana ch'in kakusajchu. Jerusalenta munakusqayrayku mana samarikusajchu, cheqan kaynin lliphirimunankama, salvacionnintaj k'anchay jina k'anchaykamunankama. 2 Chaypacha runasqa cheqan kayniykita rikonqanku; reyespis jatun kayniykita rikonqanku. Mosoj sutiwan sutichasqa kanki, chaytataj kikin Tata Diospuni sutichasonqa. 3 K'ancharishaj pillu jina Tata Diospa makimpi kanki, valorniyoj k'achitu alaja jina kanki Diosniykej makimpi. 4 Manaña jayk'ajpis, Saqerpayasqa Kaj, nispa nisonqankuchu, jallp'aykipis manaña, Ch'in nisqachu kanqa. Manachayqa, Kusikunay, nispa sutichasonqanku, jallp'aykitaj, Casarakusqay, nisqa kanqa, imaraykuchus Tata Diospa kusikuynin qampi kanqa, jallp'aykitaj casarasqa jina kanqa. 5 Imaynatachus uj waynaqa sipaswan casarakun, ajinallatataj wawasniykeqa kay jallp'aman jamonqanku may munakuywan. Imaynatachus qhariwarmi kusikunku, ajinallatataj Diosniyki qanwan kusikonqa. 6 Jerusalén, perqasniyki pataman qhawajkunata churani. Mana sayk'uspa, tuta p'unchay ninkupuni: Tata Diosta sutinta oqharejkuna, ama ch'inyakuychejchu. 7 Nitaj Tata Diosta samarikojta saqeychejchu Jerusalenta sayachinankama, kay pacha runastaj Jerusalenta jatunchanankukama, nispa. 8 Tata Diosqa paña makimpa atiyninrayku juraspa, nerqa: Manaña jayk'ajpis enemigosniykiman trigoykitaqa mikhunankupaj qosajchu, nitaj waj runaspis sinch'i trabajowan vinota ruwasqaykimanta ujyanqankuchu. 9 Manachayqa pikunachá oqharejkunalla mikhonqanku, Tata Diostataj yupaychanqanku. Pallajkunapis uvasta ch'irwaspa, vinota ujyanqanku ajllakusqay wasiy patiopi. 10 Punkusnejta puriychej; llajtaspaj ñanta kicharipuychej. Chay ñan t'oqosta khuskachaychej; ñanmanta rumista oqhariychej. Tukuy runas rikunankupaj wiphalatapis pataman oqhariychej. 11 Tata Diosqa tukuy kay pachapi kajkunaman nimun: Sionpa ususinman niychej: Qhawariy, Salvajniyki t'inkan aparisqa jamushan, imatachus wakichisqanwan oqharisqa, nispa. 12 Israelitasta sutichanqanku: Diospaj T'aqasqa Runas, Tata Diospa Preciowan Rantikusqasnin, nispa. Jerusalentataj sutichanqanku: May Munasqa Llajta, Mana Saqerpayasqa Llajta, nispa.
