ISAÍAS 6

1Rey Uziaspa wañupusqan watapi, Señorta rikorqani uj sumaj kamachina tiyanampi tiyashajta chhika patapi, may jatunchasqataj; p'achampa kantusnintaj Templonman junt'aykorqa. 2Paypa patannejpitaj Serafín nisqa ángeles kasharqanku. Sapa ujninku sojta lijrasniyojkama karqa; iskay lijrasninkuwanqa uyasninkuta pakakorqanku, iskaywantaj chakisninkuta, iskaywantaj phawasharqanku. 3Chantá purajmanta ninakusharqanku: Santo, santo, santo Tukuy Atiyniyoj Señorqa; tukuy kay pachaqa jatun kaynimpa k'anchayninwan junt'a kashan, nispa. 4Chay jinata qhaparisqankuwan Diospa Templompa punkusnin thalarikorqa, chay ukhumantaj q'oshñi junt'aykorqa. 5Chantá nerqani: Ay, imanasajtaj, kunanqa wañusajchari, imaraykuchus ñawisniywan Tukuy Atiyniyoj Rey Tata Diosta rikuni, kay jina ch'ichi simi runa kashaspa, kay jina ch'ichi parlayniyoj runaspa chawpinkupi tiyakushaspataj. 6Chantá, ujnin kaj lijrayojqa ujllata noqaman phawamorqa, altarmanta tenazaswan nina brasa oqharisqa. 7Chaywan simiyman chayaykuchiwaspa, niwarqa: Kay ninaqa simiykiman chayan. Kunanqa juchayki pichasqa kanqa, juchaykimanta llimphuchasqataj kanki, nispa. 8Chaymantataj Señorta parlajta uyarerqani: Pitataj kachasajri? Pitaj nisqaykuta willamonqari? nispa nejta. Chantá noqa nerqani: Kaypi kani, noqata kachaway ari, nispa. 9Jinapi Pay niwarqa: Rispa, kay jinata chay runasman willamuy: Allinta uyarishaspapis, mana yachayta atinkichejchu; rikushaspapis, manallataj entiendeyta atinkichejchu. 10Kay runaspa sonqonkuta rumiyachiy; ninrisninkuta wisq'aykuy, ñawisninkutapis ciegoyachiy. Manachusqa ichapis rikunkuman, uyarinkuman, entiendenkumantaj, chantá kutirikamunkuman, thañichisqa kanankupaj, nispa nerqa Señorqa. 11Noqataj taporqani: Señor, mayk'ajkamataj kay kanqari? nispa. Paytaj niwarqa: Kayqa kanqa llajtas chinkachisqa kanankama, mana uj runayoj kanankama, wasis ni piniyoj kanankama, chay campospis ch'impacha qhepakunankama. 12Kayqa kanqa Tata Diosqa runasta karuman apachinankama, chay jallp'a ch'impacha kanankama. 13Sichus chunkamanta ujllapis chay jallp'api qhepakunman chayqa, chaypis chinkachisqallataj kanqa. Chaywampis imaynatachus roble sach'ata, encina sach'atapis k'utojtinchej k'ullullanña qhepakun, ajinata qhepakonqa ajllakusqay puchu aylloqa.

will be added

X\