1 Ama samarispa, kunka llik'ikuyta qhapariy; pututu jina qhapariy. Jacobpa miraynin aylluypa juchasninta sut'iman orqhoy. 2 Sapa p'unchay mask'awanku. Paykuna ñanniyta rejsiyta munanku, cheqanta ruwaj naciompis kankuman jina, Diosninkoj kamachisqasninta manapis saqenkumanchu karqa jina. Paykuna cheqan justiciata ruwanayta mañawanku, Noqaman qayllaykamuwaspataj, kusikunku. 3 Imaraykutaj ninkichej: Noqaykoqa ayunota ruwayku, Qantajrí mana kasuta ruwawaykuchu; noqaykoqa sonqoykuta llamp'uyachiyku, Qantajrí mana repararqankichu, nispari? Qankunaqa ayunota ruwashaspa, munasqallaykichejta ruwankichej; chay p'unchaypeqa peonesniykichejtapis astawan ch'irwankichej. 4 Qankuna ayunota ruwashaspaqa, phiñanakunkichej, churanakunkichej ima, sajra sonqowantaj sajmanakunkichej. Qankunaqa janaj pachapi uyarichikuyta munaspaqa, mana jinatachu ayunota ruwanaykichejchu tiyan. 5 Noqaqa ajinatachu ayunota ruwanaykichejta munarqani, runa uj p'unchayllata k'umuykunanta? Qankunapajqa niytachu munan t'otora qhora jina k'umuykunata, chayrí qhashqa p'achata churakuspa ushpha patapi winkunata? Chayllatachu qankunaqa ayuno nispa sutichankichej, Tata Diospajtaj allin kasqantachu yuyankichej? 6 Manachu yachankichej imayna ayunotachus munasqayta? Noqaqa munani mana kajmanta ñak'arichisqa kajkunata libranaykichejta, yugopi watasqa jina runasta phaskaranaykichejta, llakichisqa kajkunata kacharinaykichejta, kallpapi atienekuspa runasta chinkachinaykichejta. 7 Munani yarqhasqaswan khuska mikhunaykichejta; wasiykichejman mana wasiyojkunata wajyarikunaykichejta; mana p'achayojkunata p'achallichinaykichejta; pisichikoj runa masisniykichejmantapis ama pakakunaykichejta. 8 Chantá k'acha kawsayniykichejqa tutamanta inti llojsimuy jina k'ancharenqa. Chaypacha nanasqasniykichejqa usqhayta sanoyanqanku; tukuy imata cheqanta ruwasqasniykichejpis sut'iman llojsenqanku, Tata Diospa jatun kaynintaj qhepaykichejmanta waqaychasonqachej. 9 Chantaqa Tata Diosmanta qhaparikojtiykichej, Payqa uyarisonqachej. Paymanta mañakojtiykichej, nimusonqachej: Kaypi kashani, nispa. Wasiykichejpi manaña chay jina ñak'arichiy kajtin, manaña chejninakuy kajtin, manañataj qhasimanta tumpay kajtin, 10 sitajchus yarqhasqasman mikhuchinkichej, ñak'arichisqa runatachus yanapankichej chayqa, laqhayajpipis k'anchayniykichej k'ancharenqa, laqhayayniykichejtaj chawpi p'unchayman jina tukonqa. 11 Tata Diosqa pusaykachasonqachejpuni. Ch'in pampaspi sumajta mikhuchisonqachej. Cuerpoykichejtapis sumajta kallpachasonqachej. Sumaj qarpasqa huerta jina kankichej, mana jayk'aj ch'akej yaku juturi jina. 12 Thuñisqa ñawpa raqaykunata mirayniykichej watejmanta sayachenqanku; chay ñawpa runaspa churasqanku cimiento patapi wasista oqharenqanku. Chaymantataj qankuna sutichasqa kankichej: Perqaj Q'asasninta Perqaykojkuna, Thuñisqa Wasista Sayachejkuna, nispa. 13 Sichus samarikuna p'unchaypi mana karuta purinkichejchu, nitaj ajllakusqay p'unchaypi munayniykichejta ruwankichejchu, sitajchus ninkichej chay p'unchayqa Tata Diospa sumaj p'unchaynin kasqanta, chay p'unchaypichus Payta yupaychankichej, imatachus munasqaykichejta mana ruwaspa, mana qankunaj munasqaykichejta mask'aspa, nitaj qankunaj parlasqasniykichejta parlaspa chayqa, 14 Tata Diospi may misk'ita kusikunkichej. Noqataj chhika pataman churasqaykichej, mikhuchisqaykichejtaj tataykichej Jacobpa herencian jallp'api, nispa nin Tata Diosqa.
