ISAÍAS 56

1Tata Diosqa nin: Justiciata ruwallaychejpuni; imatapis cheqanta ruwaychej, imaraykuchus salvanay p'unchayqa qayllapiña kashan, justiciata ruwanaypis rikuchisqa kanqa. 2Kay imasta ruwaj runaqa kusikuyniyojmin: Mana saqespa chay kamachisqasta kasoj, samarikuna p'unchayta mana saruspa waqaychaj, tukuy sajra kaj ruwanamantataj allinta qhawakojpis. 3Tata Diosman k'askakoj waj llajtayojqa ama nichunchu: Tata Diosqa ayllumanta t'aqarpariwanqachari, nispa. Eunuco nisqa capasqa runapis ama nichunchu: Noqaqa ch'aki sach'a jinalla kani, nispa. 4Tata Diosqa ajinata nin: Chay capasqa runaschus samarikuna p'unchayta waqaychanku chayqa, sitajchus munayniyta ruwaspa, tratoyta junt'ankupuni chayqa, 5Noqa wasiypi uj cheqata paykunaman qosaj, perqaswan muyuykuchisqa ukhupi. Paykunaman may sumaj yuyasqa sutita qosaj, chaytaj aswan sumaj kanqa wawasniyoj kanamanta nisqaqa. Chay wiñaypaj qosqa suteqa mana jayk'aj chinkachisqachu kanqa, nispa nin Tata Diosqa. 6Tata Diosman k'askakoj waj llajtayojkuna, Payta sirvejkuna, Tata Diospa sutinta munakuspa yupaychajkuna, samarikuna p'unchayta mana saruspa waqaychajkuna, trato ruwasqayta mana p'akejkuna ima, chaykunamanta Tata Dios nin: 7Noqa paykunata Noqapaj t'aqasqa santo orqoman pusasaj, Noqamanta mañakuna wasiypitaj paykunata kusichisaj. Q'olachinapaj uywa wañuchisqasta, jaywasqasta ima altarniyman apamusqankutaqa tukuy sonqo jap'ikusaj. Waseyqa Diosmanta mañakuna wasi sutichasqa kanqa tukuy aylluspaj. 8Tukuyta Kamachej Tata Diosqa, pichus karuman apasqa israelitasta tantamun, chay nin: Kay tukuy tantamusqaymanta jawaqa wajkunata tantamusajraj, nispa. 9Campopi tukuy phiña animales, k'ita animales ima, jamuychej ovejasta mikhoj. 10Aylluyta qhawajkunaqa ciegos kanku; mana imatapis yachankuchu. Paykunaqa kanku alqos jina mana ayñay atej; winkuspa puñuywan mana sajsakuy atejkuna, puñuy sikis kanku. 11Alqos jina mana sajsayta atej kanku. Paykuna michejkuna kashaspapis, mana yuyayniyoj wampus kanku. Sapa ujninku imatachá munasqankuta ruwaspa purinku; sapa ujninku imachá paykunapaj allin kajllata mask'akunku munasqankuman jina. 12Paykunaqa ninakullanku: Jamuychej, ujyasunchej vinota, licorwan macharikunachej; q'ayaqa kunan p'unchay jina kanqa, chayrí aswan sumajrajchus kanqapis, nispa.

will be added

X\