ISAÍAS 55

1Tukuy ch'akichikojkuna, jamuychej yakuta ujyaj. Mana qolqeyojkuna, jamullaychej, mikhullankichejtaj. Mana qolqellawan jamuspa, jap'ikullaychej vinota, lechetapis. 2Imaraykutaj qolqeykichejta tukunkichej mana mikhuna kajllapi? Imaraykutaj ganakusqaykichejta tukunkichej mana sajsachej imaspiri? Uyariwaychej allinta, allin kaj imastataj mikhunkichej, sumaj mikhunaswantaj misk'irichikunkichej. 3Ninrisniykichejta kicharispa, sumajta uyariwaychej; Noqaman qayllamuwaychej. Uyariwaychej ari kawsanaykichejpaj. Qankunawan wiñaypaj uj tratota ruwasaj, imatachus mana tukukoj munakuyniywan Davidman nerqani, chayta junt'aspa. 4Noqa paytaqa nacionesman testigo jina willajta churarqani, chantá kamachejta, yachachejta ima. 5Qanqa mana rejsisqa nacionesta wajyanki; qanta mana rejsisoj nacionespis usqhayta qanman jamusonqanku Señorniyki Tata Diosrayku, Israelpa Santo Kaj Diosnin qanta pataman oqharisusqanrayku, nispa nin Tata Diosqa. 6Tata Diosta mask'aychej, kunan tarinapaj jina kashajtin; kunan qayllapi kashajtin, Diosta wajyakuychej. 7Juchasapaqa sajra kawsayninta saqechun. Sajra runapis imatachus yuyasqasninta saqechun. Tata Diosman kutirikuchun, imaraykuchus Paymanta khuyakonqa. Diosninchejman kutirikuchun; Payqa chay runaj tukuy juchanta kantumanta pampachanqa, ima juchapis kachun. 8Tata Diosqa nin: Noqaj yuyasqasneyqa mana qankunaj yuyasqasniykichej jinachu, manataj ñanniykichejpis Noqaj ñanniy jinachu. 9Imaynachus cieloqa kay pachamanta aswan patapi kashan, ajinallataj ñanneyqa ñanniykichejmanta aswan patapi kashan, jinallataj qankunaj yuyasqasniykichejmanta Noqaj yuyasqasneyqa aswan patapi kashanku. 10Parawan, rit'iwan patamanta urmamuspa, manaña pataman kutirinchu, manachayqa jallp'ata joq'ochan, chayman tarpusqatataj poqochin, tarpojpaj muju kanampaj, runapajtaj mikhuna kanampaj. 11Ajinallataj kanqa Noqaj simiymanta llojsej nisqaypis. Noqamanqa mana ch'usajllachu kutimonqa, manachayqa Noqaj munasqayta ruwanqa; imapajchus Noqa kacharqani, chayta junt'anqa. 12Qankunaqa kusisqa jaqaymanta llojsimunkichej, sonqo junt'asqastaj kutimunkichej. Orqoswan, lomaswanqa qankunaj ñawpaqeykichejpi maytapuni takirenqanku. Campopi tukuy sach'aspis mayta t'ajllarikonqanku. 13Khishkaspa cuentanmanta pino sach'as wiñanqa; ithapalluspa cuentanmanta arrayán sach'a wiñanqa. Chayqa kanqa uj señal, Tata Diospa sutin wiñaypaj jatunchasqa kanampaj, nitaj jayk'aj chinkachisqa kanampaj.

will be added

X\