ISAÍAS 53

1Pitaj creerqa kay willasqaykuta? Pimantaj atiyninta Tata Dios rikucherqa? 2Chay runaqa Tata Diospa ñawpaqempi uj ijimoj sach'a jina wiñarqa, uj ch'aki jallp'api saphi jina. Mana k'achituchu karqa, sonqonchej payman aysakunampaj, nitaj k'acha uyayojchu karqa payta munarikunanchejpaj jina. 3Runasqa payta qhesacharqanku, pisipaj qhawarqanku. Payqa imaymana nanaywan junt'a karqa; ñak'ariypi, llakiypi ima yachasqa karqa. Paymanta uyanchejta pakaykorqanchej; payta qhesacharqanchej, manataj paytaqa munakuywan qhawarqanchejchu. 4Cheqamanta payqa onqoyninchejta aparqa, nanayninchejtataj ñak'arerqa. Yuyarqanchej paytaqa Diosmin castigaspa ñak'arichisqanta, mayta k'umuykachachisqantataj. 5Payqa t'ojsisqa karqa Diospa contranta oqharikusqanchejrayku. Juchanchejrayku tukuy cuerpon t'unasqa karqa. Jinapis pay castigasqa kasqanrayku sonqo tiyaykuyta apamuwarqanchej, aychan chay jina khallasqa kasqanraykutaj sanoyachisqa kanchej. 6Tukuyninchej ovejas jina chinkaraporqanchej, sapa ujtaj munasqanchej ñanta riporqanchej. Tata Diostajrí tukuyninchejpa juchasninchejta payman q'epiricherqa. 7Payqa may jina maqasqa, ñak'arichisqataj kaspapis, mana imatapis parlarerqachu. Payqa cordero jina ñak'anaman apasqa karqa; imaynatachus oveja millmanta ch'inllamanta ruthuchikun, ajinata mana siminta kicharerqachu. 8Payqa presochasqa karqa, juchachasqataj wañuchisqa kanampaj. Ni miraynillampis kanchu parlanapaj. Payqa runas chawpimanta chinkachisqa karqa; aylluypa juchasninrayku wañuchisqa karqa. 9Sajra runaswan khuska p'ampasqa kanampaj payta wakicherqanku, p'ampasqataj karqa qhapajkunawan. Payqa mana ima sajratapis ruwarqachu, nitaj siminmanta uj llulla parlaypis llojserqachu. 10Chay tukuywampis, Tata Diosqa munarqa pay ñak'arichisqa, t'unasqataj kananta. Pay kikin kawsayninta jucharayku uywa wañuchisqa jaywanata jina jaywaykukorqa. Chayrayku payqa mirayninta rikonqa, wiñaypajtaj kawsanqa; Paynejtataj Tata Diospa munaynenqa junt'akonqapuni. 11Chay jina llakiyta ñak'ariytawan, jatun k'anchayta rikonqa, sonqontaj junt'asqa kanqa. Chay yachayninwan cheqan Kamacheyqa ashkhasta salvanqa, paykunaj juchasninkutataj apanqa. 12Chayrayku atiyniyojkunamanwan khuska herencianta qopusaj. Chaymanta payqa atipajkunaj t'inkankuta jap'ikaponqa, pay kikin wañuyman jaywakusqanrayku. Payqa juchasapaswan khuska yupasqa karqa. Payqa tukuypa juchasninkuta aparqa, Diosmantataj chay juchasapaspaj mañaporqa.

will be added

X\