ISAÍAS 52

1Sión llajta, rijch'ariy, rijch'arikuy, atiywan p'achallikuy; Diospa ajllakusqan Jerusalén llajta, sumaj k'acha p'achaykita churakullayña, imaraykuchus mana circuncidasqa millay sajra ch'ichi runasqa manaña jayk'ajpis yaykumusonqankuchu. 2Jerusalén, sayarikuspa, chay p'achaykimanta jallp'ata thalarakuytawan, tiyaykukuy; Sión presochasqa sipas, kunkaykipi chay yugo watasusqankuta phaskarakuy. 3Tata Diosqa nin: Qankunaqa mana qolqellapi vendesqa karqankichej; chayrayku mana qolqellawantaj kacharichisqa kankichej, nispa. 4Tukuyta Kamachej Tata Diosqa nillantaj: Israel aylloyqa ñawpajta Egiptoman urayk'orqa, chaypi tiyakunampaj. Aswan qhepaman Asiriamanta runasqa qhasillamanta paykunata ñak'aricherqanku. 5Kunanqa imataj kayri? Mana imallamanta aylluytaqa karuman presota apanku. Paykunata ñak'arichejkunaqa wapuykachaspa, qhaparqachanku; Noqaj contraytapis sapa p'unchay rimanku. 6Chayrayku israelita wawasneyqa sutiyta rejsenqanku, jaqay p'unchaypitaj yachanqanku chaytaqa Noqapuni ruwasqayta. Arí, Noqapuni kani. 7Orqo patasninta sumaj willaykunata apamojpa chakisnenqa may k'achitus kanku, allin kawsaymanta sumaj willayta apamoj, pichus salvacionmanta willaraspa, Sionman nin: Diosniykeqa kamachishan, nispa, chay. 8Uyariy perqa patamanta qhawajniykikunaj qhaparisqankuta; tukuyninku ujllapi kusiymanta qhaparinku. Paykunaqa kikin ñawisninkuwan Tata Diosta Sión llajtaman kutimushajta rikorqanku. 9Jerusalén raqaykuna, kunanqa jatunmanta may kusiywan qhapariychej, imaraykuchus Tata Diosqa ayllunta sonqochan, Jerusalentataj preciowan kacharichin. 10Tata Diosqa makinta q'empirakun atiyninta rikuchinampaj tukuy nacionespa ñawpaqenkupi. Kay pachaj k'uchusnimpi tukuy tiyakojkuna rikonqanku Diosninchejpa salvacionninta. 11T'aqakuychej, llojsimuychej chay chawpimanta, amataj ch'ichipaj qhawasqa imastaqa llankhaychejchu. Paykunaj chawpinkumanta llojsimuychej; llimphuchakuychej, Tata Diosta yupaychanapaj imasninta apajkuna. 12Mana usqhay usqhaytaqa llojsinkichejchu, nitaj ayqekoj jinaqa rinkichejchu, imaraykuchus Tata Diosmin ñawpaqeykichejtaqa renqa. Israelpa Diosnin qhepaykichejtapis jamullanqataj. 13Qhawariy, kamachiytaqa tukuy imapi allin renqa. Payqa may jina jatunchasqa, may jina pataman oqharisqataj kanqa. 14Paymantaqa ashkhas t'ukorqanku, imaraykuchus runasman rijch'akuyninmantaqa manaña kasqan jinachu karqa, uyantaj manaña runaj uyanmanchu rijch'akorqa. 15Ajinallataj tukuy runasta t'ukuchenqa, reyestaj paypa ñawpaqempi mana parlariyta atenqankuchu, imaraykuchus paykunaqa rikonqanku mana jayk'aj rikusqankuta, jinataj mana jayk'ajpis uyarisqankuta entiendenqanku.

will be added

X\