ISAÍAS 50

1Tata Diosqa nin: Ama yuyaychejchu mamaykichej Israelta wijch'usqayta, imaynatachus uj runa warminta wijch'upun, jinataqa. Chayrí, yuyankichejchu mayqen manuyman vendeykususqayta? Qhawariychej, qankunaqa sajra juchaykichejrayku vendechikunkichej. Diospa contranta oqharikusqaykichejrayku mamaykichej Israelqa wijch'usqa karqa. 2Imaraykutaj jamuspaqa, mana pitapis tariparqanichuri? Imaraykutaj wajyashajtiypis, mana pipis uyariwarqachuri? Ima kajtimpis, chaymanta libranaypaj makeyqa juch'uychu karqa? Manañachu atiyneyqa kasqa paykunata salvanaypaj? Ujta k'amispalla, jatun qochasta ch'akichini, mayustataj ch'aki pampaman tukuchini; chaypi kaj challwaspis yakumanta jina wañuraspa, asnanku. 3Cielotaqa laqhayaywan p'achallichini, llakiy p'achaswan jina qhataykuni, nispa nin Tata Diosqa. 4Tukuyta Kamachej Tata Diosqa yachayniyojkunaj parlayninkuta qowarqa, chaytaqa sayk'usqasman parlaspa paykunata kallpachanaypaj. Sapa paqarin rijch'arichiwan, yachachisqan jina sumajta uyarinaypaj. 5Tukuyta Kamachej Tata Diosqa ninrisniyta kicharerqa, noqataj mana k'ullukorqanichu, nitaj qhepamampis kutirerqanichu. 6Seq'owajkunamampis wasayta jaywarqani; sunkhaytapis jaywarqani t'iranawankupaj. May jinata toreyashawajtinkupis, thoqaykushawajtinkupis, manapuni uyaytaqa pakarqanichu. 7Tukuyta Kamachej Tata Dios noqataqa yanapawanqa; chayrayku mana k'umuykachachisqachu kani. Sumajta uj chhanka jina sayani, yachanitaj mana p'enqachisqachu kanayta. 8Kutikuwajneyqa qayllallaypi kashan. Pitaj imamanta ch'ataykuwanqari? Jaku rinachej ari juezpa ñawpaqenman. Pitaj noqata ch'ataykuwajri? Qayllaykamuwaspa, uyanchawachun. 9Tukuyta Kamachej Tata Dios noqataqa yanapawanqa; pitaj juchachawanqari? Tukuyninku chinkaponqanku, imaynatachus thutaj tukusqan p'acha t'akakapun, ajinata. 10Mayqellampis Tata Diosta manchachikoj kanchu? Kamachimpa parlasqasninta kasukoj kanchu? Pichus laqhayaypi purej mana k'anchayniyoj, Tata Diospa sutimpi atienekuchun, Diospi atienekuchun. 11Qankunarí ninata jap'ichinkichej, nina k'anchaytataj wakichikunkichej. Chay nina jap'ichisqaykichejpa k'anchaynimpi puriychej. Chaywampis qankunapaj makiymanta kay jamonqa: Ñak'ariypi choqarayankichej.

will be added

X\