ISAÍAS 46

1Bel diosqa k'umpukun; Nebo diospis pampaman wijch'ukun. Lantisninkoqa burrospi chajnasqa rinku; llasa q'epis kanku chay sayk'usqa burrospaj. 2Chay dioskunaqa k'umpukunku, pampamantaj wijch'ukunku. Mana salvakuyta atispa, paykuna kikinku karu llajtaman presos apachisqa kanku. 3Uyariwaychej, Jacobpa miraynin, tukuy israelitasmanta puchojkuna ima: Manaraj naceshajtiykichej, Noqa qankunataqa q'epiykacharqaykichej. Mamaykichejpa wijsanmantapacha sumaj ichuykachasqa karqankichej. 4Machuyanaykichejkama Noqaqa kikillampuni kasaj; yuraj chujchallaña kanaykichejkama wawata jina apaykachasqaykichej. Noqa qankunataqa ruwarqaykichej, Noqallataj q'epiykachasqaykichej; tukuy imapi yanapasqaykichej, librasqaykichejtaj. 5Pimantaj rijch'achiwankichej? Noqa jinaqa pitaj kanmanri? Pimantaj kikinchawankichej rijch'anakunaykupajri? 6Wakinkunaqa wayaqasninkumanta qorita orqhonku, qolqe metalta pesaspi aysanku. Chaymantataj lanti ruwajta wajyachispa, lantita ruwachinku. Chantá chay ruwasqa diosman qonqorikuytawan, payta yupaychanku. 7Lijrariykukuytawan chay lantita apanku, maypichus kananmantaj churanku. Chaypitaj mana kuyurispa kakullan. Payta qhaparikunku, manataj uyarinchu, nillataj llakiyninkumantapis libranchu. 8Chaymanta yuyarikuspa, p'enqarikuychej ari; yuyayniykichejman tukuspa, allinta unanchakuychej, contraypi oqharikojkuna. 9Yuyarikuychej ari ñawpamantapacha imaschus kasqanta. Noqalla Diosqa kani. Noqamanta jawaqa mana waj kanchu, manataj kanchu ujllapis Noqaman rijch'akojqa. 10Qallariymantapacha qhepaman imaschus kananmanta willani. Noqaqa unaymantapacha willani, manaraj imapis kashajtin. Noqaqa nini: Noqaj wakichisqayqa junt'akonqapuni. Imatachá munasqayta ruwasaj, nispa. 11Inti llojsimuy cheqakojmanta ankata wajyani; karu jallp'amantapacha uj runatapis wajyani wakichisqayta junt'anampaj. Noqa nini, chay nisqaytataj junt'asaj; imatachus wakichisqayta ruwanaypuni tiyan. 12Uyariwaychej rumi sonqo runas, cheqan kajmanta karupi kajkuna: 13Noqaqa justiciayta qayllachimusaj, mana karupichu kashan, salvacionniytaj usqhayta chayamonqa. Sionman Noqaqa salvacionniyta churasaj, jatun kayniytaj israelitaspaj kallanqapuni.

will be added

X\