ISAÍAS 4

1Chaypacha qanchis warmis uj qharillaman ch'ipakuspa, nenqanku: Noqaykoqa mikhunallaykumanta mikhusqayku, p'achallaykuwantaj p'achallikusqayku; qanqa warmisnillaykipaj rejsiwayku, ama p'enqaypi warmisapa qhepakunaykupaj, nispa. 2Chaypacha, Tata Diospa sach'ampa ujnin raman kanqa may sumaj, k'achitutaj puchoj israelitaspaj. Jallp'aj poqoyninmanta mayta kusikonqanku, kanqataj jatunchakunapaj jina. 3Pikunachus Sionpi qhepakojkuna, chantá Jerusalenpi saqesqa kajkunapis, Diospa ajllakusqasnin sutichasqa kanqanku, pikunaj sutisninkuchus qhelqasqa kashan Jerusalenpi kawsanankupaj, chaykuna. 4Chayqa kanqa maypachachus Tata Diosqa Sionpi kaj warmispa ch'ichi kayninkuta mayllanqa, jinallataj Jerusalenpi yawar jich'asqankuta pichanqa juicionwan, ninawan ima chaypacha. 5Chantá Tata Diosqa tukuynin Sión Orqota, tantasqa runastapis, p'unchaypi yana phuyuwan, q'oshñiwan ima llanthuykonqa, tutantaj nina larway k'anchayta rikhurichenqa. Patapitaj Tata Diospa jatun kaynenqa qhatana jina chay tukuy patampi kanqa. 6Chayqa toldo jina paykunata qhataykonqa ruphaypi llanthunampaj chantá paramanta, sinch'i wayramantawan waqaychanampaj.

will be added

X\