1 Chaypacha Baladanpa churin Merodac-baladanqa Babiloniamanta rey kashaspa, cartastawan t'inkastawan Ezequiasman apacherqa, onqoyninmanta sanoyasqanta yachaspa. 2 Ezequiastaj chay kachasta kusiywan jap'ikorqa, paykunamantaj tukuy kapuyninta rikucherqa: Qolqeta, qorita, sumajta q'apaj jawinasta, sumajnin kaj aceiteta, arma jallch'ana wasista, tukuy iman kajtawan. Kamachinan wasipi, nacionnimpipis manapuni imapis qhepakorqachu mana rikuchisqanqa. 3 Chay qhepata Isaiasqa rey Ezequiasman rispa, taporqa: Maymantataj chay runas jamusqankuri? Ima nisunkutajri? nispa. Ezequiastaj nerqa: Karumanta, Babiloniamantapacha watukuwaj jamusqanku, nispa. 4 Isaías tapullarqataj: Imatataj wasiykipi rikorqankuri? nispa. Ezequiastaj kuticherqa: Paykunaman rikucherqani imaschá wasiypi kaj chhikata. Wasiypeqa mana imapis puchunchu mana paykunaj rikusqankoqa, nispa. 5 Chantá Isaiasqa Ezequiasman nerqa: Uyariy Tukuy Atiyniyoj Tata Diospa nisusqanta: 6 Uj p'unchay chayamonqa, chaypachataj Babiloniamanta jamuspa, kunankama ñawpa tatasniykej waqaychasqasninkuta, qampa jallch'asqasniykita ima apakaponqanku. Chay imasmanta ni ima puchonqachu, nispa nin Tata Diosqa. 7 Jinallataj Babiloniamanta kajkunaqa mirayniykimanta kajkunata wakinta capaspa, Babilonia reypa kamachinan wasipi kamachis kanankupaj churanqanku. 8 Chantá Ezequiasqa Isaiasman kuticherqa: Tata Diospa nisqanta parlasqaykeqa sumajpacha, nispa, imaraykuchus sonqompi yuyarqa: Noqa kawsanaykamallapis k'acha kawsakuy, sonqo tiyaykuytaj kachun, nispa.
