1 Uyarinaykichejpaj ujllapi qayllamuychej: Naciones, llajtas, allinta uyariychej. Qampis, jallp'a, uyariy imachus qampi kajkunantin. Qampis, kay pacha uyarillaytaj, qampi tukuy kawsajkunapiwan. 2 Tata Diosqa manchay phiñasqa kashan tukuy nacionespaj, tukuy soldadosninkupaj ima. Chaykunata chinkarparichenqa, wañurachisqa kanankupajtaj paykunata jaywaykonqa. 3 Chay wañusqasqa pachampi wijch'urayanqanku, ayasninkutaj millayta asnanqanku, orqospitaj yawar mayus purirenqa. 4 Cielopi ch'askaspis phirikuspa chinkaraponqanku, cielopis papel jina mayt'uykakaponqa. Tukuy ch'askas urmaramonqanku, uva sach'aj qawisqa laqhesnin urmaran jinata, chayrí higospa laqhesnin jina. 5 Janaj pachapi Tata Diospa espadanqa wakichisqa kashan. Chaytaj Edom suyupi tiyakojkunaman urmamonqa, wañunankupaj juchachasqa runasman. 6 Tata Diospa espadanqa sumaj yawarchasqa, wirawan qhoshqorishaj kashan. Chayqa ovejaspata, cabraspatapis yawarninku, carnerospa lurunisninkojpa wiranwantaj. Tata Diosqa uywa wañuchisqa jaywakuta Bosra llajtapi ruwan, Edom suyupitaj mast'allata runasta wañurachin. 7 Chay runaswan khuska wañonqanku k'ita wakas, toros, torillos ima. Chay jallp'aqa chay yawarwan ch'aranchasqa kanqa, wirawan qhoshqochasqataj kanqa. 8 Chay p'unchayqa Tata Diospa vengakunan p'unchay, Sionta ñak'arichisqankumanta pagachikuna wata. 9 Chaypacha Edompa yaku mayusnenqa breaman tukonqa, jallp'a q'oshñipis azufreman, jallp'ataj brea jina larwanqa. 10 Chaytaj tuta p'unchay larwallanqapuni, q'oshñimpis wiñaypaj q'oshñillanqapuni. Jinamanta chay jallp'aqa watan watan ch'impacha kanqa, manataj pipis ni jayk'aj chayninta purenqachu. 11 Chaypeqa tiyakonqanku jukus, ch'useqas, qharqañas, wajchillas imalla. Tata Diosqa chay llajtata tukuchenqa ch'usaj ch'impachaman. 12 Chay llajtata kamachinampaj mana rey kanqachu, chay tukuy kurajkunataj chinkaponqanku. 13 Chay jatuchaj wasisninkupeqa khishkaslla wiñanqanku, sumaj jark'achasqa wasisninkupipis ithapalluswan, qhorasllawan wiñanqanku. Chaykunapeqa atojkunallaña puñonqanku, chay patiosnintaj surispa thapallanña kanqa. 14 Ch'impi kawsaj animalesqa k'ita alqoswan tinkonqanku; k'ita cabraspis chaypi wajyanakonqanku. Tuta purej sajra animalespis chaypi kawsanqanku, samarikonqankutaj. 15 Chaypi jukupis thapachakuytawan wachanqa, ojllaspataj irpasninta t'ojyachenqa, lijran urapi sumajta pakaspataj uywanqa. Chayllamantaj suwintuspis tantakonqanku, sapa uj ch'ullanwankama. 16 Tata Diospa libronta qhawaychej, leeychejtaj. Chaypi kanqanku tukuynin chay animales, china orqo, imaraykuchus kikin Tata Diospuni chayta kamachin, Espirituntaj ujllaman chaykunata tantaykonqa. 17 Sapa uj animalesman maypichus tiyanankuta rikuchin; chay jallp'api kawsakonqanku wiñaypaj, watan watanta kikin jallp'api miraspa.
