ISAÍAS 32

1Uj rey kanqa cheqanta kamachej; kurajkunapis justiciawan kamachenqanku. 2Chaypacha sapa runa wayramanta pakakunapaj jina kanqa, loco para wayramanta pakakunapaj jina. Ch'aki jallp'api qarpanapaj larq'a jina kanqa, ch'in pampapi jatun chhankaj llanthun jinataj. 3Rikojkunaj ñawisninkoqa mana chharpuyanqankuchu; uyarejkunaj ninrisninkupis sumajta uyarenqanku. 4Wampu runasqa sumajta yachaqakuyta munanqanku; khakuta parlajkunapis sumaj sut'ita parlanqanku. 5Uj wampu runataqa mana k'acha runa nenqankuchu, nitaj ch'awkiyaj runatapis sumaj runapaj qhawanqankuchu. 6Wampu runaqa manakaj imasta thawtin, yuyaynimpitaj sajra imasta wakichin. Mana allinta ruwayllata mask'an, Tata Diospa contrantataj llullasllata parlan. Yarqhasqa kajtaqa mana imayojta, ch'usajllata kacharpayan, ch'akichikojmampis mana yakuta jaywarinchu. 7Ch'awka runaqa millay mañasniyoj; llullakuspa, sajra ruwayta wakichin, llullakuykunawan wajcha runasta ch'ipaykunampaj, mañakusqanman jina justicia paypaj kashajtin. 8K'acha runarí k'acha imastapuni ruwayta yuyan, jinamanta k'acha ruwasqasninrayku sinch'ita sayanqa. 9Qankuna, ni imamanta dakoj warmis, uyariwaychej kay nisqayta. Ni imamanta llakiyniyoj warmis, uyariwaychej kay parlasqayta. 10Qankunaqa mana imamanta llakiyniyoj kashankichej; jinapis kay uj watamantawan mancharikunkichej, imaraykuchus uvasniykichejqa tukukaponqa, manataj ima fruta poqoypis kanqañachu. 11Qankuna, ni imamanta dakoj warmis, kharkatitiychej; mana imamanta llakiyniyoj warmis, pawichikuychej. Chay p'achasniykichejta lluch'ukuspa, qhashqa p'achasta churakuychej llakisqa kasqaykichejta rikuchinaykichejpaj. 12Pechoykichejta takakuspa, waqaychej sumaj poqoj jallp'asniykichejmanta, uva huertasniykichejmantawan. 13Aylluypa jallp'ampeqa khishkaswan, ithapallusllawan wiñanku, may wasispischus sumaj kusiykuna karqa, chay kusikuna llajtapi. 14Reypa kamachinan waseqa ch'impacha qhepakonqa; chay chhika runayoj llajtapis ch'impacha kanqa. Qhawana torreswan, pakakuna wasiswanqa wiñaypaj saqerpayasqa qhepakonqanku. Chaypitaj k'ita burroslla sunt'iranqanku; wakas ima chaypi mikhonqanku. 15Chayqa ajina kanqa Diospa Espíritun patamanta noqanchejman kachamusqa kanankama. Chaypacha ch'aki ch'in pampaqa sumaj chajra poqonaman tukonqa. Sumajta chajra poqona jallp'astaj monte jina qhawasqa kanqa. 16Ch'in pampapeqa tukuy ima cheqan ruwaylla kanqa, sumajta poqoj jallp'aspipis justicia ruwayllapuni kanqa. 17Chay cheqan kajta ruwaypa poqoynenqa allin kawsay kanqa, apamullanqataj ni imamanta manchachikuyta, kusiy kawsayta ima wiñaypaj. 18Aylloyqa ni imamanta llakikuspa tiyakonqa, ni pej imananan tiyakunaspi, chaypitaj jatunta samarikonqa. 19Sichus chejchi para sach'asta q'ara k'aspillata saqerparenqa, sitajchus llajtata pampachasqata ruwanqa chaypis, 20qankunaqa kusikuyniyojmin kankichej, pikunachus mayu kantuspi tarpojkuna, burrosniykichejtawan, wakasniykichejtawan mana llakikuspa kacharparejkuna.

will be added

X\