1 Ay paykunamanta, pikunachus Egiptoman urayk'unku yanapachikunankurayku, chaykunamanta. Paykunaqa Egiptomanta jamoj caballospi atienekunku, ashkha carretaspi, caballospi wapu lloq'ajkunapi ima, manataj Israelpa Santo Kaj Diosninta qhawarinkuchu, nitaj Tata Diosta mask'ankuchu. 2 Chaywampis, Tata Diosqa aswan yachayniyoj kaspa, ashkha llakiykunata apamonqa, imatachus nisqantataj junt'anqapuni. Payqa sajra runaspa contrankuta oqharikonqa, chay sajra runasta yanapajkunaj contrankutapis. 3 Egiptomanta kajkunaqa runaslla kanku manataj Dioschu; caballosninkoqa aychalla kanku, manataj espirituschu. Chayrayku Tata Diosqa makinta oqharejtin, chay yanapaj urmanqa, jinallataj yanapachikojpis. Jinamanta iskayninku ujllapi urmachisqa kanqanku. 4 Tata Diosqa kay jinata niwarqa: Uj leonqa chayrí león uñapis ovejata wañuchispa, aycha patapi mayta phiñarikun; michejkuna mancharichinankupaj tantakamunku chaypis, mana mancharichiyta nitaj ayqechiyta atinkuchu. Ajinata Tukuy Atiyniyoj Tata Diosqa Sión Orqoman enemigospa contrankuta maqanakoj urayk'amonqa. 5 Imaynatachus uj p'isqoqa thapan patata phawaykachaspa irpasninta jark'akun, ajinata Tukuy Atiyniyoj Tata Diosqa Jerusalenta jark'akonqa, libranqataj, waqaychanqa, salvanqataj. 6 Israelpa wawasnin, Diosman kutirikamuychej ari, Pejpa contrantachus oqharikorqankichej, chayman. 7 Chay p'unchaypi sapa ujniykichej qolqe metalmanta chayrí qorimanta ruwasqa lantisniykichejta pampaman choqankichej, mayqenkunatachus juchasapa makisniykichejwan ruwakorqankichej, chaykunata. 8 Chaypacha Asiriaqa wañuchinaku maqanakupi tukuchisqa kanqa, manataj runaj espadanwanchu. Asiriosqa wañuchinaku maqanakumanta ayqenqanku, sumachaj maqanakoj wayna runasninkupis sinch'i trabajosman churasqa kanqanku. 9 Pakakuna chhanka jina kaj Asiriaqa manchachikuywan chinkarenqa, kurajninkukunapis maqanakuna wiphalankuta saqerparenqanku mayta manchachikusqankurayku. Chayta Tata Dios nin, pejpa nina larwaynin Sionpi kashan, Jerusalenpitaj ruphachina hornoyoj, chay.
