ISAÍAS 25

1Tata Dios, Qanmin Diosneyqa kanki. Pataman sutiykita oqharispa jatunchayki, imaraykuchus t'ukuna imasta ruwanki, unaymantapacha cheqa wakichisqaykita junt'aspallapuni. 2Llajtasta rumi loqhoman tukuchinki. Perqaswan sumaj jark'achasqa llajtasta raqayman tukuchinki. Enemigospa sinch'ichasqa wasisninkuta thuñinki, chaykunataj manaña jayk'ajpis ujtawan ruwakonqankuchu. 3Chayrayku may jina kallpasapa runasqa jatunchasonqanku, may jina manchana atiyniyoj runaspis manchachikusonqanku. 4Qanqa wajchaj pakakunan kanki, llakisqa pisichikojpa jark'akojnin, para wayramanta waqaychaj, ruphaymanta llanthojtaj. Sajra runaspa samayninkoqa kashan, chiri tiempopi loco para perqaman seq'on, ajina, 5q'ara pampapi ruphay jinataj. Qanqa atiyniyojkuna forasterospa ch'ajwasqankuta ch'inyachinki. Imaynatachus phuyoj llanthun ruphayta chiriyachin, ajinata manchachikuna atiyniyoj runasta tukuyninkuta ch'inyachinki. 6Tukuy Atiyniyoj Tata Diosqa Sión Orqopi tukuy llajtaspaj jatun mikhuyta wakichenqa, misk'i mikhuykunawan, sumaj kaj vinoswan ima. Chantá sumaj kaj aycha mat'asta mikhuchenqa, aswan sumajnin vinostawan ujyachenqa. 7Kay orqopi Payqa, tukuy llajtasta qhatasharqa, chayta chinkarparichenqa, tukuy nacionesta uj manta jina qhatasharqa, chayta. 8Payqa wañuyta wiñaypaj chinkachenqa, tukuypa waqaynintataj Tukuy Atiyniyoj Tata Diosqa pichanqa. Ayllumpa mana allimpaj qhawasqa kayninkuta tukuy kay pachamanta chinkachenqa. Ajinata Tata Diosqa nin. 9Chaypacha nenqanku: Qhawaychej, kaymin Diosninchejqa. Paypi maytapuni suyakorqanchej, Paytaj salvawarqanchej. Kaymin Tata Dios, pipichus atienekorqanchej, chay. Kunanqa kusikunachej jatun kusiywan salvawasqanchejmanta. 10Tata Dios makinwan Sión Orqota waqaychanqa, Moab naciontatajrí pachampi saronqa, imaynatachus pajata q'opata jich'anapi sarunku, ajinata. 11Moabqa puraj makisninta jaywarenqa, imaynatachus yakupi wayt'aj runa makisninta jaywarakun, ajinata. Diostajrí jatunchakuyninta astawan chinkachenqa, jinallataj makisnimpa kallpantapis. 12Diosqa chay chhikachaj jark'akuna sinch'i perqasninta urmachenqa; pampaman choqarpayanqa jallp'aman tukunankama.

will be added

X\