1 Tiroj contrampi willay: Tarsispi kajkuna barcos, waqaychej, imaraykuchus Tiroqa thuñisqa kashan mana uj wasiyoj. Chayrayku barcos ni mayman yaykunankupaj kanchu. Quitim jallp'amantapacha chay imastaqa yachachimunku. 2 Tiropi kaj runas, ch'inlla kaychej, jinallataj Sidonmanta ranqherospis, pikunapajchus barcospi tukuy imata apamoj kanku, chaykuna. 3 Jatun Qochanejta apamoj kanku granota Sihormanta, jinallataj chajra poqoytapis Nilo Mayumanta. Chaywan qhapajyakoj kanku Tiromanta runas, chaypitaj tukuy naciones qhatoj kanku. 4 Sidón llajta, p'enqakuy ari kunanqa, Jatun Qochapi jark'achasqa llajta, imaraykuchus Jatun Qocha nin: Ni mayk'aj noqaqa wawasta rejserqanichu, nitaj nacechikoj warmej nanayninwan jap'ichikorqanichu, nitaj wawatapis paqarichinichu. Manataj wayna churista, nitaj ususistapis uywakorqanichu. 5 Egiptomanta kajkunaqa Tiro llajta urmasqanta yachaspa, mayta llakikonqanku. 6 Tarsiskama riychej, mama qocha kantuspi tiyakojkuna, waqarikuychej. 7 Kaychu mayta kusikoj unayniyoj llajtaykichej? Kaychu runasninta tiyakunankupaj karuman kachaj llajta? 8 Pitaj kayta wakicherqa Tiroj contrantari? Chay llajtaqa reyespa llajtanku karqa; ranqherosnimpis kamachejkuna karqanku, vendejninkunapis kay pachapi sumaj runaspaj qhawasqa karqanku. 9 Kaytaqa Tukuy Atiyniyoj Tata Diosmin wakicherqa, mayta machu machu kasqankuta p'enqaypi rikhurichinampaj, jinallataj kay pachapi mayta k'umuykuchinampaj. 10 Tarsis llajta, jallp'ata llank'ay, imaynatachus Nilo Mayu kantupi llank'anku, ajinata, imaraykuchus barcos ruwanaykeqa manaña kanqachu. 11 Tata Diosqa mama qocha pataman makinta oqharerqa, jinataj tukuy nacionesta kharkaticherqa; Canaanpa sumaj perqaswan jark'achasqa llajtasninkutapis thuñinankuta kamacherqa. 12 Chantá nerqa: Manaña kusikunkichu, jatun ñak'ariypi kaj Sidonpa ususin. Sayariytawan, Quitimman chimpay, chaypipis qanqa manapuni samarikuyta tarinkichu. 13 Caldeospa jallp'ankuta qhawariy, mayqenchus kunan mana kasu ruwana, chayta. Chay llajtataqa Asirios saqerparerqanku ch'innejpi tiyakoj animalesllapaj. Paykunaqa muyuynimpi torresta sayachiytawan, llajtata jap'ispa kamachina wasisninta thuñerqanku; llajtantinta raqayllata saqerqanku. 14 Tarsismanta kaj barcos, waqaychej kunanqa, imaraykuchus maypichus pakakunaykichejqa thuñisqañamin. 15 Chaypacha Tiro llajtaqa qanchis chunka watasta qonqasqa kanqa, uj reypa kawsanan tiempota. Chay qanchis chunka watas qhepata Tiro llajtaqa phisu warmej kay takiynin jina kanqa: 16 Qonqarparisqa phisu warmi, arpaykita oqharispa, llajtata muyumuy. Sumajta tocay, sumajtataj takiy, yuyarisqa kanaykipaj. 17 Chay qanchis chunka watas qhepata Tata Diosqa Tiro llajtamanta yuyarikonqa. Watejmantataj millay kawsayman kutirenqa, kay pachapi kaj tukuy nacioneswantaj khuchichakonqa. 18 Chay ganasqasnintajrí Tata Diospaj t'aqasqa kanqa. Chayqa mana waqaychasqachu kanqa, nitaj jallch'asqachu kanqa, manachayqa Tata Diosta sirvejkunapaj kanqa, paykuna sajsakunankukama mikhunankupaj, sumajtataj p'achallikunankupaj.
