1 Mosqoypi Jina Rikuna Vallej contranta kay willakun: Imataj tiyan tukuyniykichej wasi pataman wicharinaykichejpajri? 2 Imaymana qhapariywan, ch'ajwawan junt'a kaj llajta, kusiypi kawsaj llajta. Wañusqasniykeqa mana espadawan wañuchisqachu kanku, nitaj wañuchinaku ch'ajwapi wañuchisqachu kanku. 3 Tukuy kurajniykikuna ayqekorqanku. Paykunaqa presochasqas kanku mana flechana arcosllawan. Wapu runasniyki karuman ayqeshaspapis, jap'ichikullarqankupuni. 4 Chayrayku nerqani: Ithiriychej noqamanta; jik'un jik'unta waqarikusaj, llajta tukuchisqa kasqanmanta. Ama sonqochawaytaqa yuyaychejchu. 5 Tukuy Atiyniyoj Tata Diosqa nerqa qhaparina llakiy, atipachikuna p'unchay chayamunanta. Chaymanta Mosqoypi Jina Rikuna Vallepi perqasta urmachinku, qhapariykunataj orqosman chayan. 6 Elammanta kajkunaqa flechasninkuta wakichinkuña, carretasninkuman, caballosninkumampis wicharinkuña. Kirmanta kajkunapis jark'akuna escudosninkuta orqhomunku. 7 Chay sumaj vallesniykiman carretasqa junt'aykun, caballospi kajkunataj llajta punkupi sayaykunku. 8 Judajpa jark'akunanqa urmanña. Chay p'unchaypi qankunaqa Montepi Jatun Wasipi kaj arma waqaychana cuartota qhawarqankichej. 9 Davidpa llajtampa perqasnimpa ch'ejtakusqanta rikorqankichej, ura kaj qochamantaj yakuta junt'acherqankichej. 10 Jerusalenpi wasista yuparqankichej, wakin wasistataj urmacherqankichej, llajta muyuykoj perqasta sumajta sayachinaykichejpaj. 11 Chay iskay perqas chawpipi uj qochata ruwarqankichej, chay ñawpa qochamanta yakuta jap'inaykichejpaj. Chaywampis pichus Ruwajta mana allimpi qhawarqankichejchu, nitaj unay Ruwajmantapis yuyarikorqankichejchu. 12 Chayrayku, Tukuy Atiyniyoj Señor Tata Diosqa wajyasorqachej, mayta llakikuspa waqanaykichejpaj, umaykichejtataj ruthukunaykichejpaj, qhashqa p'achastataj churakunaykichejpaj. 13 Astawampis asikorqankichej, kusikorqankichejtaj; ovejasta, wakastapis ñak'aytawan, sumaj aychata mikhuspa, vinotapis ujyaspa, nerqankichej: Mikhuna, ujyana, imaraykuchus q'aya wañupusun, nispa. 14 Kayta Tukuy Atiyniyoj Tata Diosqa sut'inchawarqa: Wañunaykichejkama kay juchataqa mana perdonasqaykichejchu, nispa nin Tukuy Atiyniyoj Señor Tata Diosqa. 15 Tukuy Atiyniyoj Señor Tata Diosqa niwarqa: Rispa, kamachina wasipi mayordomo Sebnaman nimuy: 16 Imaykitaj kaypi tiyapusunki? Piniykitaj kaypi tiyapusunki? Pitaj kamachisunki aya p'ampanata ruwakunaykita aswan patanej chhankapi jusk'uspa, chaypi samarinaykipaj? 17 Atiyniyoj runa, Tata Diosqa karuman wijch'usonqa. Sinch'ita jap'isuytawan, 18 pelotata jina morq'oykuspa, karu jatun nacionkama bolalachisonqa. Chaypi wañunki, chaypitaj mentasqa carretasniyki qhepakonqanku, qantaj wiraqochiykej wasimpaj uj p'enqay kanki. 19 Chay maypichus kashanki, chaymanta qharqosqayki, mayordomo kanaykimanta wijch'usqayki. 20 Chaypacha Hilciaspa churin Eliaquim kamachiyta wajyasaj. 21 Payta p'achasniykiwan p'achallichisaj, kamachina chumpiykiwantaj chumpichisaj. Kamachej kanaykita payman qopusaj, paytaj Jerusalenpi tiyakojkunapaj uj tata jina kanqa, jinallataj Judá ayllupajpis. 22 Davidpa wasimpa llaventapis kunkanman warkhuykusaj. Pay kicharejtenqa, ni pipis wisq'ayta atenqachu, wisq'ajtintaj, ni pipis kichariyta atenqachu. 23 Payta uj clavota jina sinch'ita perqaman takaykusaj, tatampa ayllunta allimpi rikhurichinaypaj. 24 Tatampa wasimpi imaschus allin kajqa chaypi warkhusqa kanqa: Wawasnin, allchhisnin ima, tukuy vasos, imaymana kaj yurus ima. 25 Chaypacha, chay sinch'i perqapi clavoqa sik'ikaponqa, urmachisqataj kanqa. Chaypi warkhusqa kajkunataj tukuyninku phirikonqanku, nispa nin Tukuy Atiyniyoj Tata Dios.
