1 Asiriamanta rey Sargonqa ujnin kaj kamachinta Asdod llajtaman kacharqa. Chaypacha Asdod llajtata maqanakupi atipaspa, jap'ikaporqa. 2 Jinapi Tata Diosqa Amospa churin Isaiasman parlaspa, nerqa: Chay qhashqa p'achaykita lluch'ukuy, jinallataj chakiykimanta juk'utasniykitapis, nispa. Isaiastaj ajinata ruwarqa, mana juk'utasniyoj, ukhu p'achallayojtaj karqa. 3 Chantá Tata Dios nerqa: Kamachiy Isaiasqa kinsa wata junt'ata ukhu p'achayojlla, q'ara chaki purerqa, Egiptopaj Etiopiapajwan imachus kananta rikuchispa. 4 Ajinata Asiriamanta reyqa Egiptopi kajkunatawan, Etiopiapi kajkunatawan, wayna runasta, jinataj machu runastawan ukhu p'achayojllata waj nacionman presos apachenqa, q'ara chakisllata, q'ara sikinku rikhurishajta, Egipto p'enqakunampaj. 5 Etiopiapi suyakojkuna jinallataj Egiptopipis atienekojkuna p'enqakuywan manchachikonqanku. 6 Chaypacha mama qocha kantuspi tiyakojkuna nenqanku: Qhawariychej atienekusqanchej nación imapichus rikhurisqanta. Ima mana allin kajtimpis, payman qayllakoj kanchej, Asiria reymanta jark'akunawanchejpaj. Kunanqa imaynallatataj ayqekusunri? nispa.
