1 Amospa churin Isaiasqa kayta mosqoypi jina rikorqa Judamanta, Jerusalenmantawan: 2 Qhepa p'unchaykunapi kay jina kanqa: Maypichus Tata Diospa Templon kashan, chay orqoqa tukuy orqosmanta aswan patapi sayachisqa kanqa, oqharisqataj kanqa tukuy orqosmanta aswan pataman. Tukuy nacionestaj chaymampuni jamonqanku. 3 Ashkha runas jamuspa, nenqanku: Jakuchej, Tata Diospa orqonman wicharinachej, Jacobpa Diosnimpa wasinman; Payqa ñankunanmanta yachachiwasunchej, chaki ñankunampi purinanchejpaj, nispa. Leyqa Sionmanta rikhurenqa; Tata Diospa simi nisqampis Jerusalenmanta rikhurillanqataj. 4 Payqa nacionesta juzganqa, ashkha runaspajtaj justiciata ruwanqa. Espadasninkuta arado rejasman tukuchenqanku, t'ojsina lanzasninkumantataj hocesta ruwakaponqanku. Nitaj mayqen naciompis waj naciompa contranta maqanakunampaj wakichikonqachu, nitaj wañuchinaku ch'ajwapajpis oqharikonqachu. 5 Jakuchej, Jacobpa ayllun, Tata Diospa k'anchaynimpi purinachej. 6 Qanqa Jacobpa ayllunmanta kajkunata saqerparerqanki. Paykuna ukhupi junt'a kashan inti llojsimuynejmanta jamoj yatiriswan, jinallataj adivinoswan, filisteos ukhupi kashanku, chay jina. Waj llajtayojkunawan tratosta ruwakunku. 7 Nacionninkoqa qoriwan, qolqewan junt'a kashan, waqaychasninkupis mana tukukoj kanku. Jinallataj chay naciompeqa junt'a kashan caballos, mana yupay atina qhatatina carretas ima. 8 Chantá lantiswan junt'allataj kashan; runasqa ima lantistachus ruwasqasninkuta yupaychanku, kikin makisninkoj ruwasqasnillankutataj. 9 Chaykunaj ñawpaqenkupi runasqa k'umuykukunku, runastaj chay jinaman chayanku; paykunataqa ama perdonaychu. 10 Chhanka jusk'uman chinkaykuy; Tata Diospa mancharikuna jina kayninmanta pakaykukuy, jatun kaynimpa lliphipiyninmantawan. 11 Uma oqharej runaqa k'umuykuchisqa kanqa, runaykachaj runataj pampaman urmachisqa kanqa. Chay p'unchaypeqa Tata Dioslla jatunchasqa kanqa. 12 Chaypachaqa Tukuy Atiyniyoj Tata Diospa p'unchaynin jamonqa runaykachajkunaj contrankupi, uma oqharejkunaj contrankupi, may kasqankuta yuyakojkunaj contrankupi ima, k'umuykuchisqa kanankupaj. 13 Jamullanqataj Libanomanta tukuy chhikachachaj cedrospa contrankupi, jinallataj Basanmanta encina nisqa sach'aspa contrankupi. 14 Jatun orqospa contrankupi jamonqa, oqharisqa lomaspa contrankupipis. 15 Tukuy jatun torrespa contrankupi jamonqa, sinch'i perqaspa contrankupipis. 16 Tarsismanta tukuy barcospa contrankupi jamonqa, qhatunapaj ashkha imasniyoj barcospa contrankupi ima. 17 Ajinamanta runaj wapuykachaynenqa k'umuykuchisqa kanqa, runaj machu machu kaynintaj urmachisqa kanqa. Chay p'unchaypeqa Tata Dioslla jatunchasqa kanqa. 18 Lantispis chinkachisqallataj kanqanku. 19 Chaypacha runasqa chhanka jusk'usman sat'iykukonqanku, chinkaykonqanku jallp'aj lajrasninman, Tata Diospa mancharikuna jina kayninmanta ayqespa, jatun kaynimpa lliphipiyninmantawan, kay pachata castigaj jamojtin. 20 Chay p'unchaykunapi runasqa qorimanta, qolqe metalmanta ima yupaychanankupaj ruwakusqanku lantista juk'uchasman, chiñisman ima wijch'onqanku. 21 Chinkaykonqanku qaqa jusk'usman, chhanka jusk'usman, pakakuspa Tata Diospa mancharikuna jina kayninmanta, jatun kaynimpa lliphipiyninmanta ima, kay pachata castigaj jamojtin. 22 Amaña runapi atienekuychejchu, pejpa senqampichus samaynillan kashan, chaypi. Imapajpunitaj pay allin kasqari?
