ISAÍAS 18

1Ay, qanmanta, ashkha lijraspa sonarinanku nación, mayus kantupi kaj Etiopía jallp'a. 2Jatun qochanta kachasta kacharqanki, yaku patanta t'otoramanta ruwasqa botespi. Usqhayta correj kachas, riychej, jatunkaray qaranku k'ancharishaj runaspa llajtankuman. Qallariymantapacha manchachikuna nación kanku, atiyninkuwan atipaj llajta, chay jallp'ankutaj ashkha mayusniyoj. 3Tukuy kay pachapi kaj runas, kay jallp'a patapi kajkuna, orqo puntaspi wiphalata sayachejtinku, rikunkichej; cornetata waqachejtinkukama, uyarinkichej. 4Tata Dios kay jinata niwan: Ch'inllamanta kakusaj, tiyakunaymanta qhawamullasaj, imaynatachus inti k'ancharimuspa k'ajarin, ajinata, imaynatachus cosecha tiempopi q'oñimojtin chhulla phuyu phuyuykun, ajinata. 5Uva sach'a t'ikayta pasajtin, uvas llulluyta qallarishajtintaj, manaraj cosecha tiempota chaypacha ramasninta k'uturanqa. Aysarikoj ramasnintataj k'utuspa, wijch'onqa. 6Ajinamanta tukuy chaykuna suwintuspaj, k'ita animalespajwan saqesqa kanqanku. Chaypi suwintusqa q'oñi tiempopi kanqanku, chayllapitaj k'ita animalespis chiri tiempota pasanqanku. 7Chaypacha Tukuy Atiyniyoj Tata Diosman chay runas ofrendata apamonqanku. Paykunaqa jatunkaray qaranku k'ancharishaj runas kanku, qallariymantapacha tukuypa manchachikunan ayllu, atiyninkuwan tukuyta atipaj, chay jallp'ankutaj ashkha mayusniyoj. Chay ofrendata Sión Orqoman apamonqanku, maypichus Tukuy Atiyniyoj Tata Diospa sutinta yupaychanku, chayman.

will be added

X\