ISAÍAS 17

1Damasco llajtaj contrampi kay willay tiyan: Damascoqa manaña llajtachu kanqa, manachayqa raqaykunallaña kanqa. 2Aroer llajtasqa wiñaypaj saqerpayasqa kanqanku; chayqa uywa corralllaña kanqa. Chaypi uywasqa puñonqanku, nitaj pipis mancharichej kanqachu. 3Efraínpi perqaswan jark'achasqa llajtasqa manaña kanqankuchu, Damascoj kamachiynimpis nillataj kanqachu. Siriamanta puchojkunaqa israelitaspa jatun kayninku jina kanqanku, nispa nin Tukuy Atiyniyoj Tata Diosqa. 4Chay p'unchaypi Jacobpa jatun kaynenqa pisiyaponqa, jinallataj cuerpompis tulluyanqa. 5Chayqa kanqa imaynatachus uj ruthoj trigota ruthun jina, chayrí imaynatachus uj runa makinwan trigo umasta pallan Refaim Vallepi, ajina. 6Chaypi lastrojollaña qhepakonqa, chayrí imaynatachus olivo sach'ata thalajtinchej puntampi uj iskayllaña aceitunas qhepakun, ajinata, chayrí tawa, phishqallaña ramasnimpi qhepakun, ajina. Ajinata nin Israelpa Señornin Tata Dios. 7Chay p'unchaypi runaqa Ruwajninman kutirenqa. Kikin ñawisninwan Israelpa Santo Kaj Diosninta qhawanqa. 8Manaña makinwan ruwasqa altaresta qhawanqachu, nitaj waj imasta ruwasqasnintapis, nitaj k'ullu lantistapis, nitaj maypichus lantisman inciensota q'oshñichinku, chay altarestapis. 9Chay p'unchaypi perqaswan sumaj jark'achasqa llajtasniyki saqesqa kanqanku, imaynatachus amorreos, heveos llajtasninkuta saqerqanku israelitasta manchachikusqankurayku, ajina. Jinamanta ch'impachaman tukonqanku. 10Qanqa Salvajniyki Diosta qonqaporqanki. Mana qanqa waqaychasoj chhankamanta yuyarikorqankichu. Astawampis qanqa sumaj sach'asta plantarqanki, waj dioskunata yupaychanaykipaj. 11Mujusta plantarqanki, chay p'unchaypacha wiñacherqanki, q'ayantimpachataj t'ikacherqanki. Chaywampis chay poqoynenqa llakiy p'unchaypi chinkaponqa, chay nanay onqoytaj mana jampiy atina kanqa. 12Ashkha llajtaspa ch'ajwasqanku uyarikun, mama qochaj qhollchoqeyasqan jina; chayqa ashkha nacionespa ch'ajwayninku, ashkha yakuspa sonaynimpis kanman jina. 13Chaywampis Dios paykunata k'amejtinkama, karuman ayqerikaponqanku, orqopi wayraj apaykachasqan q'opa jina, chayrí muyoj wayra jallp'ata oqharin, ajinata. 14Ch'isiyaykuyta may jina manchachikuna kashan paykunapaj, sut'iyamuytataj mana kankuñachu. Ajinaman patanchejpi purejkunaqa chayanku, chay suwarawanchej, chaykunapis.

will be added

X\