ISAÍAS 16

1Sión Orqoman ch'in pampapi Selamantapacha, uj corderota apachiychej kay jallp'ata kamachejman. 2Moabpi tiyakojkunaqa Arnón Wayq'o kantupi, mancharichisqa thapankumanta ayqekoj p'isqos jina kashanku. 3Jinapi Sionman ninku: Yuyaychawayku, imaynatachus ruwanaykuta niwayku ari. Chawpi p'unchaypi llanthuykiwan pakaykuwayku ari ch'isin jina. Waj nacionesman chay presos apasqa kajkunataqa pakaykuy ari, amataj ayqekojkunata jap'inawaykupaj jaywaykuwaykuchu, ari. 4Moabmanta ayqekojkunata wajyarikuy ari, chay ñak'arichejkunamanta paykunata pakay ari. Chay ñak'arichejqa tukukonqa. Chay jinatapuni tukuchejqa chinkarenqa. Chay sarojpis kay jallp'amanta chinkachisqa kanqa. 5Chaypacha khuyakuywan uj kamachina tiyana sayachisqa kanqa, chaypitaj Davidpa mirayninmanta uj rey tiyaykonqa. Payqa allin justiciata ruwanqa, cheqan kajtataj sayachenqa. 6Moabmanta runaspa mayta wapuykachasqankumanta uyariyku, mayta runaykachasqankumanta, machu machu kasqankumantapis. Chaywampis may kasqankuta parlasqankoqa yanqhalla. 7Chayrayku Moabpi tiyakojkunaqa nacionninkumanta waqanku; may llakisqa waqanqanku Kir-hareset llajtapi uva k'isasmanta. 8Hesbonpi chajrasqa, Sibmapi kaj uva huertaswanqa ch'akipunku, waj nacionesmanta kamachejkuna sarurasqankurayku. Chay sach'aspa ramasninkoqa Jazerkama chayaj; ch'in pampanejtataj aysarikuspa, Jatun Qocha chimpakama chayaj. 9Chayrayku llakikuspa, Jazermanta waqaykusaj, Sibmapi kaj uva huertasmantawan. Hesbonmanta, Elealemantawan waqayniyta jich'asaj, imaraykuchus cosechasniykimanta kusiy ch'ajwaqa mana uyarikunchu. 10Llank'ana jallp'aspi kusiy takiy tukukaponqa; uva huertaspi manaña takiykuna kanqachu. Manaña vino ruwanapaj uvastapis ch'irwanqankuchu, imaraykuchus kusiywan ch'ajwasqankutaqa ch'inyachini. 11Chayrayku tukuy sonqoywan Moabmanta arpa jina waqani, jinallataj Kir-haresetmantapis. 12Moabqa may jinatapis orqo pataman wicharispa, sayk'unankama mañakuchun, yupaychana wasinmampis mañakoj yaykuchun; mana imatapis tarenqachu. 13Kay nisqasta Tata Diosqa Moabmanta nisqa unay tiempomantapachaña. 14Kunantajrí Tata Dios kay jinata nin: Kinsa watamantawan uj wata runaj sirvinan tiempo jina, Moabpa may uyarisqa atiynenqa, tukuy runasninwan urmanqanku; pisisllaña puchonqanku, nitaj imatapis ruwayta atenqankuchu.

will be added

X\