ISAÍAS 13

1Amospa churin Isaiasqa mosqoypi jina uj sut'inchayta rikorqa Babilonia imaynachus kananmanta. 2Uj q'ara orqo puntapi maqanakuna wiphalata sayachiychej; chaypi maqanakupaj jatunmanta qhapariychej. Makisniykichejwan soldadosta wajyaychej, kurajkunaj punkusninkuta yaykunankupaj. 3Noqa kamachiniña ajllakusqasniyta, chantaqa wajyallanitaj wapu kamachisniyta phiñakuyniyta junt'anankupaj, pikunachus atipasqaymanta kusikunku, chaykunata. 4Orqospeqa ch'ajway uyarikun, may chhikapis kankuman jina. Chaypi uyarikun ashkha runaspa ch'ajwasqanku, ashkha nacionespa tantakuspa ch'ajwasqanku. Tukuy Atiyniyoj Tata Diosqa soldadosninta wañuchinaku maqanakupaj yupan. 5Chaykunaqa karu llajtasmanta jamunku, kay pachaj k'uchusninmantapacha. Chaykunaqa Tata Diospa kachamusqasnin kanku, Paypa k'ajaj phiñakuynimpi castigoswan tukuynin kay pachata tukuchinankupaj. 6Qhaparispa, waqaychej, imaraykuchus Tata Diospa p'unchaynenqa qayllaña kashan. Chayqa jamonqa Tukuy Atiyniyojmanta uj chinkarparichiy jina. 7Chayrayku tukuy runaj makin llawch'iyanqa, jinallataj tukuy runaj sonqompis liwikaponqa. 8Manchachikuywan kharkatiylla junt'aykonqa; phutiywan nanayllawan paykunataqa jap'enqa, imaynatachus wijsallisqa warmi nanaywan sunt'in, ajinata. Mancharisqas paykunapura qhawanakonqanku, imaraykuchus uyasninku nina jina k'ajarenqa. 9Tata Diospa p'unchaynenqa manchaytapuni jamushan, manchay ñak'ariy p'unchay, k'ajaj phiñakuywan jallp'ata ch'impachata saqenampaj, juchasapastapis chinkarparichinampaj. 10Cielopi kaj ch'askas, imaschus k'anchajkuna ima manaña k'anchanqankuchu. Inteqa llojsimuytawan, laqhayaykaponqa; killapis manaña k'anchanqachu. 11Tata Dios nin: Kay pachata juchanmanta castigasaj, sajra runastataj millay juchasninkumanta. Sajra runaspa machu machuykachayninkuta ch'inyachisaj; may kasqankuta yuyakojkunata k'umuykachachisaj. 12Runastaqa ch'uwa qorimantapis aswan pisi tarikoj kanqanku, Ofir qorimantapis aswanraj. 13Chantá cielota kharkatichisaj. Kay pachatapis kananmanta kuyurichisaj, chay p'unchaypi Noqa Atiyniyoj Tata Diospa phiñakuyniy phatasqanrayku. 14Runasqa mancharichisqa kanqanku, qhatiykachasqa taruka jina, mana michejniyoj ovejas jinataj. Sapa uj llajtankumankama ayqenqanku, jallp'ankumankamataj riponqanku. 15Pillapis jap'ichikojqa t'ojsisqa kanqa, pichus taripachikojpis espadawan wañuchisqa kanqa. 16Qhawashajtinku, wawasninkoqa pampaman ch'allpasqa kanqanku; wasisninkumanta imasninkuchus kajta suwaranqanku, warmisninkutapis abusaranqanku. 17Medosmanta kajkunata paykunaj contrankuta sayarichisaj, pikunachus qolqemanta mana dakunkuchu, nitaj qoritapis munapayankuchu, chaykunata. 18Arcoswan flechaspa, waynasta wañurachenqanku; juch'uy wawastapis mana khuyanqankuchu; jatuchaj wawasta wañuchiymantapis mana llakikonqankuchu. 19Babiloniaqa nacionespa sumaj kaj walqanku jina, caldeospa mentasqanku llajta. Jinapis chay llajtataqa Dios tukuchenqa, imaynatachus tukucherqa Sodomata Gomorratawan, ajinata. 20Manaña chaypi jayk'ajpis runas tiyakonqankuchu, nitaj llajtachakonqankuchu. Arabespis manañapuni chaypi jarakonqankuchu, nitaj michejkunapis chaypi uywasninkuta michenqankuchu. 21Chaypeqa phiña k'ita animalesllaña kawsakonqanku; chay wasisninkupeqa ch'useqasllaña junt'a kanqanku. Chantá suris chaypi tiyanqanku, k'ita cabras imataj chaypi phinkiykachanqanku. 22Kamachina wasisninkupeqa atojkunalla waqanqanku, sumachaj wasisninkupitaj k'ita alqoslla kawsakonqanku. Babiloniaj ñak'arinan p'unchayqa qayllamushanña; chay p'unchayqa usqhayllata chayarparimonqa.

will be added

X\