OSEAS 9

1Ama kusikuychu Israel; ama kusikuywan phinkiriychu waj llajta jinaqa. Qanqa khuchichakorqanki Diosniykita saqerpayaspa. Grano trillana eraspi khuchichakusqaykimanta pagota jap'iyta gustachikunki. 2Israel aylloqa mana trigoyoj nitaj vinoyoj kanqa; mosoj vinon kajpis pisilla kanqa. 3Efraínqa Egiptoman kutirenqa, Asiriapitaj mikhonqa ch'ichipaj qhawasqa mikhunasta. Manaña Tata Diospa jallp'ampeqa tiyakonqachu. 4Mana ujyanqankuchu vinotapis Tata Diospa sutimpi, nillataj uywa wañuchisqatapis chaypi jaywanqankuchu. Mikhunanku t'antapis qorpachu t'anta jina kanqa; pischus mikhojkunaqa ch'ichipaj qhawasqa rikhurenqanku. Paykuna mikhuykonqanku chay t'antata; chaywampis Tata Diospa Templonman mana apaykuyta atenqankuchu. 5Imatataj qankuna ruwankichej chay fiesta p'unchaypi, Tata Diospa sutimpi ruwankichej, chay fiesta p'unchaypi? 6Paykunaqa chinkachisqas kanamanta ayqenku. Egiptoqa paykunata oqharenqa, Menfispitaj p'ampasqas kanqanku. Qolqe jallch'anasninkupi ithapallu qhoraslla junt'aykonqanku, jarasninkupipis khishkaslla wiñaykonqa. 7Chayamunkuña castigana p'unchaykunaqa. Ña chayamunkuña ruwasqankuman jina pagana p'unchaykunaqa. Israelpis yachanqa chay p'unchaykuna chayamusqankuta. Qankuna ninkichej: Profetaqa wampu, yuyaychasqa runapis ancha uman muyusqa, nispa. Chay tukuyta ninkichej juchawan junt'a kasqaykichejrayku, jinataj phiñakuywan junt'a kasqaykichejrayku. 8Diosqa profetanta churarqa Efraínta qhawanampaj, qankunatajrí chay purinanman tojllasta churarqankichej; Diospa Templompi payta chejninkichej. 9Millay kawsaypi pierdekorqankichej Gabaa tiempopi jina. Chaywampis Tata Diosqa yuyarikonqa tukuy sajra ruwasqasniykichejmanta, chantá castigasonqachej chay juchasniykichejmanta. 10Tata Diosqa nin: Maypachachus Israelta tarerqani chaypachaqa, kusikorqani, ch'in pampapi uvasta tarikuspa kusikunku, jinata. Ñawpa tatasniykichejqa Noqapaj karqanku ñawpa poqoj higos jina. Jinapis maypachatajchus Baal-peorman qayllarqanku chaypachaqa, chay qhasi manakaj dioskunallaman sirvej churakorqanku, jinamanta millachikunaman tukorqanku, chay mayqentachus munakusharqanku, chay lantiman jina. 11Efraínpa may jatun kasqanqa uj phawaj p'isqo jina phawanqa. Mana astawan wawas nacekonqañachu, manaña wijsallisqa warmis kanqachu nitaj yumasqaspis. 12Wawasninkuta uywanqanku chaypis, Noqa chay wawasta qhechukapusaj ni uj puchuyojta. Ay, imachus kay runasmanta kanqa paykunamanta karunchakojteyqa. 13Rikuni, Efraínqa wawasninta jap'inapaj k'ita animalta jina qhawasqanta. Payqa orqhomun paykunata wañuyman jaywaykunallampaj. 14Tata Diosníy, paykunaman qollay imachus qonaykita. Warmisqa mana wawa rejsej kachunku, ch'aki ñuñustaj. 15Tata Diosqa nin: Gilgalpi tukuy imaymana juchasta ruwarqanku, chaypitaj paykunata chejnikuyta qallarerqani. Chay sajra ruwasqasninkuraykutaj wasiymanta paykunata wijch'usaj. Manaña paykunata munakullasajpunichu, imaraykuchus chay kurajninkukuna tukuyninku contraypi oqharikorqanku. 16Efraínqa nanasqasniyoj kashan. Payqa ch'aki saphisniyoj sach'a jina, chayrayku manaña poqonchu. Wawasnin kajtimpis, Noqaqa tukuyta wañurachisaj. 17Kay aylloqa Diosniyta mana kasuyta munarqachu. Chayraykumin Diosneyqa paykunata qhesachallanqataj, tukuy naciones ukhupi puriskiris jina purinankupaj.

will be added

X\