OSEAS 8

1Waqachiy cornetaykita, imaynatachus uj qhawaj soldadoqa Tata Diospa ayllunta mana puñuspa qhawan, jinata, imaraykuchus tratoyta p'akinku. 2Chaykamataj jamuwanku Noqaman qhaparispa: Qanta rejsikapuyku Israelpa Diosnimpaj, nispa. 3Israeltajrí allin kajta qhesachan, chayraykutaj enemigosnin payta qhatiykachanqanku. 4Mana Noqallawan reyesta churakunku. Kuraj kamachejkunatapis mana yachasqallay ajllanku. Qolqesninkuta, qorisninkutapis oqharispa, lantista ruwakunku, jinamanta paykuna kikinku chinkachisqa kanankupaj. 5Qan, Samaria, torillo lantita ruwakusqaykiwan millachikuni. Phiñakuyniy k'ajarin contraykichejpi. Mashkha unaypitaj llimphuchakuyta atinkichej, israelitas? 6Samariapi chay torillo lanteqa mana Dioschu. Chaytaqa runalla ruwan; chayraykumin phirisqa kanqa. 7Paykunaqa wayrasta tarporqanku, oqharerqankutaj sinch'i muyoj wayrata. Mana kanqachu cosechanankupaj jina chajrasninkupis, nitaj jak'utapis orqhoyta atenqankuchu trigo umasmanta; sichus orqhonqanku chaypis, waj runaslla mikhukaponqanku. 8Israeltaqa oqoykonqanku. Waj llajtayojkunaqa Israelta qhawanqanku ni imapaj allin vasota jina, 9imaraykuchus Asiriaman wicharerqanku sapan purikoj k'ita burro jina. Efraínqa qolqewan mink'akorqa qharisninta. 10Chay llajtas ukhupi t'inkasta rak'irachumpis, Noqa paykunata ch'eqerachisajpuni. Jinamanta uj tiempotaqa ni reyes nitaj kurajkunapis kanqachu, 11imaraykuchus Efraínqa may chhika altaresta ruwakorqa, chaykunataj juchallinallampaj karqa. 12Noqaqa may chhika yachachiykunata paypaj qhelqaporqani, paytajrí mana rejsej tukorqa. 13Paykunaqa anchatataj munanku uywa wañuchisqasta jaywayta, chay jaywasqaspa aychankutataj mikhukapunku. Tata Diostajrí mana chayta jap'ikunchu; chay millay ruwasqasninkumanta yuyarikonqa, chay juchankumantataj paykunata castiganqa. Chantá paykuna Egiptoman kutirenqanku. 14Israelqa kamachina wasista ruwan, ruwajnin Diosmantatajrí qonqakapun. Judapis oqharin ashkha jark'achasqa llajtasta, Noqatajrí chay llajtasman ninata jap'iykuchisaj tukuy jatuchaj wasisninta ruphanampaj.

will be added

X\