1 maypachatajchus Efraínta, Samariatawan jampikapuyta munarqani chaypachaqa, juchasninku sut'inchakorqa. Tukuyninku llullas kanku, suwas jina wasisman yaykuykunku, ñan patapi runasmantapis kallpaman atienekuspa suwaj churakunku. 2 Mana reparankuchu chay tukuy sajra ruwasqasninkuta yuyayniypi jap'ishasqayta. Kunanqa chay kikin ruwasqasnillankutaj paykunata wisq'aykun, chay tukuytataj Noqa rikushani. 3 Aylloyqa millay ruwasqasninkuwan llulleriosninkuwantaj reyta, kurajkunatapis kusichinku. 4 Tukuyninku khuchi kawsayniyoj purinku. Paykunaqa horno jap'ichisqa jina kanku, mayqentachus enqhajqa saqerparin masa poqonankama, chay jina. 5 Maypachachus reyninchej pilluchakorqa chaypacha, kurajkunaqa payta onqoykucherqanku vinota ujyachispa. Paytaj makinta jaywarqa alqochakojkunaman. 6 Sonqonkoqa uj horno jina k'ajarin sajra ruwayta wakichisqankuwan. Phiñakuyninku brasas jina k'ajarin ch'isipi, tutamantataj nina jina larwarin. 7 Arí, tukuy paykunaqa horno jina k'ajarishanku, kamachejninkukunatataj q'olaykunku. Tukuy reyesninku urmasqaña kashanku, manañataj ni ujpis kanchu qhaparikamuwajqa. 8 Efraínqa waj aylluswan chhapuykukun. Efraínqa, imaynatachus uj t'anta uj ladollanmanta ruphaykun, jinamin kashan. 9 Mana rejsisqa runas kallpanta ch'onqanku, paypa mana rikukusqallan. Chujchasnimpis yurajyaporqa mana reparakusqallan. 10 Israelpa runaykachasqanqa testigo jina contrampi sut'inchashan. Chaywampis paykunaqa mana kutirikorqankuchu, nitaj Señorninku Tata Diosta mask'arqankuchu. 11 Efraínqa mancharisqa paloma jina, mana allin yuyayniyoj; Egiptomanta yanapata mañakun, chantarí Asiriamampis qayllaykullantaj. 12 Jaqayman rejtinkurí, ch'ipayta paykunaj patankuman choqaykusajpacha, p'isqosta jina urmarachisaj. Ajinata paykunata castigasaj juchasninkurayku. 13 Ay paykunamanta, Noqamanta t'aqakuwasqankurayku. Chinkachisqa kananku p'unchay chayamonqa contrayta oqharikusqankurayku. Munani paykunata salvayta, paykunatajrí contraypi llullasta parlanku. 14 Qhaparikamuwanku puñunankupi kashaspa, manataj tukuy sonqochu wajyakuwanku. Trigota, vinotawan mañakuspa cuerponkuta khuchurakunku, contraypitaj oqharikorqanku. 15 Noqa paykunata yachacherqani, makisninkupipis kallpata qorqani, paykunarí contraypi sajra ruwayta yuyaychakorqanku. 16 Lantisman kutiporqanku manataj Diosmanchu. Imaynatachus uj wist'u arcoj flechan waj ladollaman ripun, ajinallatataj paykunapis waj ladollaman ripunku. Runaykachaspa parlasqankurayku kurajninkukuna espadawan wañuchisqas kanqanku, Egiptopitaj paykunamanta runas asiykukonqanku.
